ଭୁବନେଶ୍ବର: ଦୁଇଟି ପୃଥକ ଘଟଣାରେ ୫୫୦ଟି ପାରା ଉଦ୍ଧାର ସହ 4 ଗଞ୍ଜେଇ ବସ୍ତା ଜବତ କରିଛି ରେଳୱାଇ ସୁରକ୍ଷାବଳ । ଶନିବାର ବଲାଙ୍ଗୀର ଷ୍ଟେସନରୁ ଚୋରା ଚାଲାଣ କରାଯାଉଥିବା ପାରା ଗୁଡିକୁ ଉଦ୍ଧାର କରିବା ସହ ଢେଙ୍କାନାଳ ଅଞ୍ଚଳରୁ ଗଞ୍ଜେଈ ଚୋରାଚାଲାଣ କରୁଥିବା ମୁଖ୍ୟ ଅଭିଯୁକ୍ତଙ୍କୁ ଗିରଫ କରିଛି ରେଳୱାଇ ସୁରକ୍ଷାବଳ I
ସୂଚନା ଅନୁଯାୟୀ , ଶନିବାର ରେଳୱାଇ ସୁରକ୍ଷାବଳ ବଲାଙ୍ଗୀର ଷ୍ଟେସନଠାରେ ହାଓଡ଼ା-ଜଗଦଲପୁର ସମଲେଶ୍ବେରୀ ଏକ୍ସପ୍ରେସ ଟ୍ରେନର ସାଧାରଣ ଦ୍ଵିତୀୟ ଶ୍ରେଣୀ ବଗିରୁ ୭ଟି ଟୋକେଇରେ ବେଆଇନ ଭାବେ ଚାଲାଣ କରାଯାଉଥିବା ୫୫୦ ପାରାଙ୍କୁ ଉଦ୍ଧାର କରିବା ସହିତ ଏହି ଘଟଣାରେ ଜଣକୁ ଅଟକ ରଖିଥିଲା I ତେବେ ଉଭୟ ପାରା ଓ ଅଟକ ରଖିଥିବା ବ୍ୟକ୍ତିକୁ ବଲାଙ୍ଗୀର ଜିଲ୍ଲା ବନ ବିଭାଗକୁ ହସ୍ତାନ୍ତର କରାଯାଇଛି I
ଏପଟେ ଢେଙ୍କାନାଳ ଓ ଖୋର୍ଦ୍ଧା ସ୍ଥିତ ରେଳୱାଇ ସୁରକ୍ଷାବଳ କ୍ରାଇମ ଇଣ୍ଟେଲିଜେନ୍ସ ବିଭାଗ ଦ୍ବାରା ଢେଙ୍କାନାଳ ସ୍ଥିତ କୁଞ୍ଜକଣ୍ଟା ଠାରେ ଏକ ଦୋକାନ ଉପରେ ମିଳିତ ଚଢ଼ାଉ କରିଥିଲେ । ଏଥିରେ ଜଣକୁ ଗିରଫ କରିବା ସହ ଚାରି ବସ୍ତା (୧୬୦ କି.ଗ୍ରା.) ଗଞ୍ଜେଈ ଜବତ କରିଛି ରେଳୱାଇ ସୁରକ୍ଷାବଳ ।
ତେବେ ଜବତ ହୋଇଥିବା ଗଞ୍ଜେଇର ଆନୁମାନିକ ମୂଲ୍ୟ ୮୦ ହଜାର ଟଙ୍କା ହେବ I