ଭୁବନେଶ୍ବର:ସାମୁଦ୍ରିକବାତ୍ୟା ୟସ ପ୍ରଭାବରେ ରାଜ୍ୟର ଅନେକ ଜିଲ୍ଲାରେ ଅତ୍ୟଧିକ ବର୍ଷା ହୋଇଛି । ଯାହା ଫଳରେ ସୁବର୍ଣ୍ଣରେଖା ନଦୀରେ ବନ୍ୟା ଆଶଙ୍କା ସୃଷ୍ଟି ହୋଇଛି । ଏହାକୁ ନେଇ ଜଳସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀ ଜ୍ୟୋର୍ତିର୍ମୟ ରଥ ପ୍ରତିକ୍ରିୟା ରଖିଛନ୍ତି ।
ଜଳସଂପଦ ବିଭାଗ ମୁଖ୍ୟ ଯନ୍ତ୍ରୀ ସୂଚନା ଦେଇ କହିଛନ୍ତି ଯେ, କୌଣସି ଲୋକ ସୁବର୍ଣ୍ଣରେଖାକୁ ଯାଆନ୍ତୁ ନାହିଁ। ଆଜି ଅପରାହ୍ନ ସୁଦ୍ଧା ସୁବର୍ଣ୍ଣରେଖାରେ ମଧ୍ୟମ ଧରଣର ବନ୍ୟା ଆସିବାକୁ ଯାଉଛି । ନିବେଦନ କରୁଛୁ ନଦୀକୁ କେହି ଯାଅନ୍ତୁ ନାହିଁ । ଆସନ୍ତାକାଲି ପର ଠାରୁ ନଦୀରେ ପାଣି କମିବ । ବନ୍ୟା ବାବଦରେ ଜିଲ୍ଲା ଦାୟିତ୍ବରେ ଥିବା ଆଇଏଏସ ବିଶାଲ ଦେବ ଓ ଭୋଗରାଇ ବିଧାୟକଙ୍କୁ ଅବଗତ କରାଯାଇଛି । ଆଜି ଉପରେ ମୁଣ୍ଡରେ ବର୍ଷା ହୋଇନାହିଁ । ବୈତରଣୀରେ ମଧ୍ୟମ ଧରଣ ବନ୍ୟା ଦେଖାଦେଇଛି । ଆଖୁଆପଦା ଠାରେ ବିପଦ ସଂକେତ ଠାରୁ ୨ ଫୁଟ ଉପରେ ପାଣି ଅଛି, ଧୀରେ ଧୀରେ ଏହା କମୁଛି । ଆନନ୍ଦପୁରରେ ବିପଦ ସଂକେତ ୮ ଫୁଟ ତଳେ ପାଣି ରହିଛି । ଉପର ମୁଣ୍ଡରେ ପାଣି ନାହିଁ । ବୁଢାବଳଙ୍ଗ, ସୁବର୍ଣରେଖାରେ ମଧ୍ୟମ ବନ୍ୟା ଆସିବ । ପୂର୍ଣିମା ଯୋଗୁଁ ନିଷ୍କାସନ ହୋଇ ପାରୁ ନ ଥିଲା । ଏହା ଏକ ମଧ୍ୟମ ଧରଣର ବନ୍ୟା ବୋଲି ଜଳସଂପଦ ବିଭାଗର ଯନ୍ତ୍ରୀ କହିଛନ୍ତି ।