ଭୁବନେଶ୍ବର: ଆଜି ଶ୍ରାବଣ ମାସର ପ୍ରଥମ ସୋମବାର । ଦୀର୍ଘ ଦୁଇ ବର୍ଷର ଅପେକ୍ଷା ପରେ ଭକ୍ତ ଓ ଭଗବାନ ଏକାଠି ହୋଇଛନ୍ତି । ଏହି ଅବସରରେ ଆଜି ହଜାର ହଜାର କାଉଡ଼ିଆ ପ୍ରଭୁ ଲିଙ୍ଗରାଜଙ୍କୁ ଜଳଲାଗି କରିଛନ୍ତି । ବୋଲବମ, ହରହର ବମ ଧ୍ବନିରେ କମ୍ପି ଉଠିଛି ପୁରା ରାଜଧାନୀ । ପ୍ରଥମ ସୋମବାର ଲାଗି ଭୁବନେଶ୍ବରସ୍ଥିତ ବାବା ଲିଙ୍ଗରାଜ ମନ୍ଦିରରେ ଭକ୍ତଙ୍କ ଭିଡ଼ ଦେଖିବାକୁ ମିଳିଛି । ଦେବଦେବ ମହାଦେବଙ୍କ ଉପରେ ପାଣି ଢାଳି ଶ୍ରଦ୍ଧା ଓ ଭକ୍ତିର ସହ ଶୁଭ ମନାସୁଛନ୍ତି କାଉଡ଼ିଆ ।
ଲିଙ୍ଗରାଜରେ ପାଣି ଢାଳିଲେ କାଉଡ଼ିଆ ଗତକାଲି ବିଭିନ୍ନ ନଦୀରୁ ପାଣି ଉଠାଇ ଆଜି ଲିଙ୍ଗରାଜ ମନ୍ଦିରରେ ମାନସିକଧାରୀ କାଉଡ଼ିଆ ଜଳଲାଗି କରିଛନ୍ତି । ଶୃଙ୍ଖଳିତ ଦର୍ଶନ ପାଇଁ କମିଶନରେଟ ପୋଲିସ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି । ଭକ୍ତଙ୍କ ସୁବିଧା ଦର୍ଶନ ପାଇଁ ବ୍ୟାରିକେଡର ବ୍ୟବସ୍ଥା ହୋଇଛି । ଜଣେ ଅତିରିକ୍ତ ଡିସିପଙ୍କ ନେତୃତ୍ୱରେ ୫ ଜଣ ଏସିପି, ୮ ଜଣ ଆଇଆଇସି, ୩୩ ଏସଆଇଙ୍କ ସହ ୬ ପ୍ଲାଟୁନ ପୋଲିସ ଫୋର୍ସ, ୫୦ ହୋମ ଗାର୍ଡ ନିୟୋଜିତ ହୋଇଛନ୍ତି । ବାବା ଲିଙ୍ଗରାଜଙ୍କ ସାନିଧ୍ୟ ଲାଭ କରି ବେଶ ଆନନ୍ଦିତ ଅଛନ୍ତି ଶ୍ରଦ୍ଧାଳୁ ।
ଇଟିଭି ଭାରତ, ଭୁବନେଶ୍ବର
