ଭୁବନେଶ୍ବର: ନୟାପଲ୍ଲୀ ଥାନା ନିକଟସ୍ଥ ଆଇଡି ମାର୍କେଟର ଏକ ଫାଷ୍ଟଫୁଡ୍ ଦୋକାନ ଭିତରୁ ମିଳିଲା ଜଣେ ଯୁବକଙ୍କ ଗଳିତ ମୃତଦେହ । ଶରୀରର ଅଧିକାଂଶ ଅଂଶ ପଚି ଯାଇଥିବା ଯୋଗୁଁ ତାଙ୍କର ପରିଚୟ ମିଳିପାରିନାହିଁ । ଘଟଣାସ୍ଥଳରେ ପୋଲିସ ପହଞ୍ଚି ଶବ ଉଦ୍ଧାର କରିବା ସହ ବ୍ୟବଚ୍ଛେଦ ପାଇଁ କ୍ୟାପିଟାଲ ହସ୍ପିଟାଲକୁ ପଠାଇଛି । ହତ୍ୟା ନାଁ ଆତ୍ମହତ୍ୟା ଏଯାଏଁ କିଛି ସ୍ପଷ୍ଟ ହୋଇନାହିଁ ।
ଭିଡିଓ ସୌଜନ୍ୟ: ସମ୍ବାଦଦାତା, ଭୁବନେଶ୍ବର
ସ୍ଥାନୀୟ ଲୋକଙ୍କ କହିବା ମୁତାବକ ଯୁବକ ଜଣକ ସେହି ଫାଷ୍ଟ ଫୁଡ୍ ଦୋକାନରେ କାମ କରୁଥିଲେ । ତେବେ ପ୍ରାୟ 4 ଦିନ ଧରି ଦୋକାନ ବନ୍ଦ ରହିଥିଲା । ଭିତରୁ ପଚା ସଢ଼ା ଗନ୍ଧ ଆସିବାରୁ ଲୋକେ ସନ୍ଦେହ କରି ପୋଲିସକୁ ଖବର ଦେଇଥିଲେ । ଘଟଣାସ୍ଥଳରେ ନୟାପଲ୍ଲୀ ଥାନା ପୋଲିସ ପହଞ୍ଚିବା ପରେ ଦୋକାନର ଭିତର ପଟୁ ତାଲା ପଡ଼ିଥିବା ଜାଣିବାକୁ ପାଇଥିଲା । ଶେଷରେ କବାଟ ଭାଙ୍ଗିବାରୁ ଭିତରୁ ମିଳିଥିଲା ଯୁବକଙ୍କର ମରଶରୀର ।