ଭୁବନେଶ୍ବର: ଅପର ଇନ୍ଦ୍ରାବତୀରେ ୬୦୦ ମେଗାୱାଟ ପମ୍ପ ଷ୍ଟୋରେଜକୁ ଅନୁମୋଦନ । ଅନୁମୋଦନ ଦେଇଛି ସିଡବ୍ଳ୍ୟୁସି । କଳାହାଣ୍ଡି ଜିଲ୍ଲା ଅପର ଇନ୍ଦ୍ରାବତୀରେ ୬୦୦ ମେଗାୱାଟ ପମ୍ପ ଷ୍ଟୋରେଜ ନିମନ୍ତେ ଓଡ଼ିଶା ଜଳବିଦ୍ୟୁତ ନିଗମ ଅନୁମତି ପାଇଛି ।
ଇନ୍ଦ୍ରାବତୀ ସମେତ ୩୦୦ ମେଗାୱାଟ୍ କ୍ଷମତାସଂପନ୍ନ ଅପର କୋଲାବ ଏବଂ ମାଲକାନଗିରି ଜିଲ୍ଲାର ବାଲିମେଳାରେ ୫୦୦ ମେଗାୱାଟ୍ର ଷ୍ଟୋରେଜ ପମ୍ପ ସକାଶେ ନିଗମ ପ୍ରସ୍ତାବ ରଖିଥିଲା । କେନ୍ଦ୍ର ଜଳ କମିଶନ (ସିଡବ୍ଳ୍ୟୁସି) ୬୦୦ ମେଗାୱାଟ୍ ବିଶିଷ୍ଟ ପମ୍ପ ଷ୍ଟୋରେଜ ପାଇଁ ଆନ୍ତଃରାଜ୍ୟ ଅନୁମୋଦନ ପ୍ରଦାନ କରିଛି । ଏଣିକି ଏହି ପ୍ରକଳ୍ପ ନିମନ୍ତେ ବୈଷୟିକ-ଆର୍ଥିକ ଅନୁମୋଦନ ସକାଶେ ଓଏଚ୍ପିସି କେନ୍ଦ୍ର ବିଦ୍ୟୁତ ପ୍ରାଧିକରଣ ନିକଟରେ ଆବେଦନ କରିବ । ଏହା ପ୍ରାପ୍ତ ହେଲା ପରେ ପ୍ରକଳ୍ପ କାର୍ଯ୍ୟକାରୀ ନିମନ୍ତେ ବାଟ ଫିଟିବ । କଳାହାଣ୍ଡିର ଅଗମ୍ୟ ଅଞ୍ଚଳ ସ୍ଥିତ ଏହି ପମ୍ପ ଷ୍ଟୋରେଜ ପ୍ରକଳ୍ପର କ୍ଷମତା ୬୦୦ ମେଗାୱାଟ ରହିଛି । ଏଥିରେ ଲାଗିବାକୁ ଥିବା ଚାରୋଟି ସ୍ୱତନ୍ତ୍ର ଭାବେ ଡିଜାଇନ କରାଯାଇଥିବା ପ୍ରତ୍ୟେକ ଟର୍ବାବାଇନରୁ ୧୫୦ ମେଗାୱାଟ ବିଦ୍ୟୁତ ଉତ୍ପନ୍ନ ହେବ । ଏହା ଓଡ଼ିଶା ଶକ୍ତି ଗ୍ରୀଡ଼କୁ ବାର୍ଷିକ ୧୦୪୦ ମିଳିୟନ ୟୁନିଟ ବିଦ୍ୟୁତ ଯୋଗାଇବ ।