ଭୁବନେଶ୍ବର: ଚାଷୀଙ୍କୁ ଦିଆଯାଉଥିବା ସମବାୟ ସମିତିରୁ ଋଣରେ ରହିବ ସ୍ବଛତା । ଋଣକୁ ନେଇ ବାରମ୍ବାର ବିଭିନ୍ନ ସମୟରେ ଅଭିଯୋଗ ଆସିବା ପରେ ଏନେଇ ବିଭାଗୀୟ ମନ୍ତ୍ରୀ ନିର୍ଦ୍ଦେଶନାମା ଜାରି କରିଛନ୍ତି । ଏଣିକି ଉଭୟ ଖରିଫ ଓ ରବି ଫସଲ ଋଣ ପ୍ରଦାନର ୭ ଦିନ ମଧ୍ୟରେ ଋଣ ନେଇଥିବା ଚାଷୀଙ୍କ ତାଲିକା ସର୍ବସାଧାରଣରେ ପ୍ରକାଶ କରିବା ପାଇଁ ନିଷ୍ପତ୍ତି ନିଆଯାଇଛି । ପ୍ରାଥମିକ ସମବାୟ ସମିତି ଲ୍ୟାମ୍ପସରୁ ଫସଲ ଋଣ ନେଇନଥିବା ଚାଷୀଙ୍କ ନାମରେ ଲେଜରରେ ଋଣ ନେଇଥିବା ଅଭିଯୋଗ ଆସିବା ପରେ ଏପରି ନିଷ୍ପତ୍ତି ନିଆଯାଇଛି।
ଏହି ମର୍ମରେ ନିବନ୍ଧକ, ସମବାୟ ସମିତି ସମୂହ ସମସ୍ତ ଡିଭିଜନର ଡିଆରସିଏସ ଏବଂ ସମସ୍ତ ସର୍କଲର ଏଆରସିଏସଙ୍କୁ ନିର୍ଦ୍ଦେଶନାମା ଜାରି କରିଛନ୍ତି । ଏଣିକି ଫସଲ ଋଣ ପ୍ରଦାନ କରୁଥିବା ସମବାୟ ସମିତିର ମୁଖ୍ୟ କାର୍ଯ୍ୟନିର୍ବାହୀ ଋଣ ଗ୍ରହୀତାଙ୍କ ତାଲିକା ପ୍ରସ୍ତୁତ କରିବେ। ଯେଉଁଥିରେ ଉଭୟ ମୁଖ୍ୟ କାର୍ଯ୍ୟନିର୍ବାହୀ ଏବଂ ସମବାୟ ସମିତିର ସଭାପତିଙ୍କର ଦସ୍ତଖତ ରହିବ । ଏହି ତାଲିକାକୁ ସମବାୟ ସମିତିର ନୋଟିସ ବୋର୍ଡରେ ଲଗାଯିବା ସହିତ ଏପରି ସ୍ଥାନରେ ପ୍ରଦର୍ଶିତ ହେବ। ଯାହା ଦ୍ବାରା ସାଧାରଣ ଲୋକେ ଏହାକୁ ଦେଖିବା ପାଇଁ ସୁଯୋଗ ପାଇବେ। ତାଲିକାରେ ଗ୍ରାମର ନାମ, ଫସଲ ଋଣ ନେଇଥିବା କୃଷକଙ୍କ ନାମ, ଅନୁମୋଦନ ହୋଇଥିବା ଋଣର ପରିମାଣ ଏବଂ ପ୍ରଦାନ କରାଯାଇଥିବା ପରିମାଣ ସ୍ପଷ୍ଟ ଭାବେ ଉଲ୍ଲେଖ ରହିବ।