ଭୁବନେଶ୍ବର: ସାଧାରଣ ନିର୍ବାଚନରେ ଶୋଚନୀୟ ପରାଜୟ ବରଣ କଲା କଂଗ୍ରେସ । ରାଜ୍ୟରେ କଂଗ୍ରେସ ଗତ ଥର ଅକ୍ତିଆର କରିଥିବା 16 ବିଧାନସଭା ଆସନରୁ ଖସି ଚଳିତ ଥର 9ରେ ପହଞ୍ଚିଲା । ମୁଖ୍ୟ ବିରୋଧୀ ଦଳର ଭୂମିକା ନିଭାଉଥିବା କଂଗ୍ରେସ ଚଳିତ ଥର ବିଜେପିକୁ ଆଗକୁ ଛାଡିଦେଲା । ତେବେ ଦଳର ଏପରି ଦୟନୀୟ ସ୍ଥିତି ପାଇଁ ଦାୟୀ କିଏ ? କଣ ପାଇଁ ଦଳ ରାଜ୍ୟରେ ତୃତୀୟ ସ୍ଥାନକୁ ଖସିଲା ? ଏସବୁର ବର୍ତ୍ତମାନ କାରଣ ଖୋଜାଚାଲିଥିବାବେଳେ ଦଳର ନେତାମାନେ ନିଜକୁ ଦାୟୀ କରୁଛନ୍ତି ।
ଭିଡିଓ ସୌଜନ୍ୟ: ସମ୍ବାଦଦାତା, ଭୁବନେଶ୍ବର
ଲୋକଙ୍କୁ ଦେଇଥିବା କଥା ରଖିପାରିଲାନି କଂଗ୍ରେସ । ଛଅ ମାସ ଆଗରୁ ଟିକେଟ ବଣ୍ଟନ କଥା ହେଉ, କି ପରିବାର ପିଛା ଜଣଙ୍କୁ ଟିକେଟ ହେଉ, ଅଥବା ଅମାନତ ହରାଇଥିବା ପ୍ରାର୍ଥୀଙ୍କୁ ଟିକେଟ ନ ଦେବା କଥା ହେଉ ସବୁଥିରେ ଫେଲ୍ ମାରିଲା ରାଜ୍ୟ କଂଗ୍ରେସ । ଯାହା ଦଳକୁ ରସାଦଳକୁ ନେବାରେ ପ୍ରମୁଖ ଭୂମିକା ନିଭାଇଲା ବୋଲି ଚର୍ଚ୍ଚା ହେଉଛି । ଯାହାକୁ ଖୋଦ୍ ପିସିସି ସଭାପତି ସ୍ବୀକାର କରିବା ପରେ ରାଜନୈତିକ ଅଳିନ୍ଦୁରେ ଚର୍ଚ୍ଚା ଜୋର ଧରିଛି ।