ଭୁବନେଶ୍ବର: ଦିନକୁ ଦିନ କ୍ୟାପିଟାଲ ହସ୍ପିଟାଲରେ ରୋଗୀଙ୍କ ସଂଖ୍ୟା ବଢିବାରେ ଲାଗିଛି । ରୋଗୀ ସଂଖ୍ୟା ଦୃଷ୍ଟିରେ ରଖି ଅନେକ ସେବା ଯୋଗାଉଛନ୍ତି ମେଡିକାଲ କର୍ତ୍ତୃପକ୍ଷ । ଗତ ୬ ମାସର ତଥ୍ୟ କହୁଛି କ୍ୟାପିଟାଲ ହସ୍ପିଟାଲର ପଞ୍ଜିକରଣ ସଂଖ୍ୟା ଅନେକ ମାତ୍ରାରେ ବୃଦ୍ଧି ପାଇଛି।
କ୍ୟାପିଟାଲ ହସ୍ପିଟାଲର ଉନ୍ନତି ସହ ରୋଗୀଙ୍କୁ ଉଚିତ ମାତ୍ରାରେ ସେବା ଯୋଗାଇ ଦେଉଛନ୍ତି କର୍ତ୍ତୃପକ୍ଷ । ଯାହାକୁ ନେଇ ଅନେକ ରୋଗୀଙ୍କ ମନରେ ଆଶା ଆକାଂକ୍ଷା ବିଶ୍ବାସ ରହିଛି କ୍ୟାପିଟାଲ ହସ୍ପିଟାଲ ଉପରେ। ଓପିଡି ଓ ଆଇପିଡିରେ ରୋଗୀଙ୍କ ସଂଖ୍ୟାରେ ବୃଦ୍ଧିପାଉଛି । ହସ୍ପିଟାଲରେ ପ୍ରସବ ହେଉଥିବା ମହିଳା ବେଶ ଉପକୃତ ହେଉଛନ୍ତି।
ତଥ୍ୟ ଅନୁସାରେ ସ୍ତ୍ରୀ ଓ ପ୍ରସୂତି ବିଭାଗରେ ଏପ୍ରିଲରେ ୧୦୦୨, ମେ ମାସରେ ୧୦୯୩, ଜୁନ ମାସରେ ୯୪୪, ଜୁଲାଇ ମାସରେ ୯୪୫, ଅଗଷ୍ଟ ମାସରେ ୧୧୦୩, ସେପ୍ଟେମ୍ବର ମାସରେ ୧୧୧୧ ଜଣ ଶିଶୁ କ୍ୟାପିଟାଲ ହସ୍ପିଟାଲରେ ଜନ୍ମ ନେଇଛନ୍ତି। ମୋଟ ୬ ମାସରେ ୬୧୯୮ ଜଣ ଜନ୍ମ ନେଇଥିବା ବେଳେ ସେମାନଙ୍କ ମଧ୍ୟରୁ ୪୩୫ ଜଣଙ୍କ ମୃତ୍ୟୁ ଘଟିଛି।
ସୂଚନା ଅନୁଯାୟୀ, କ୍ୟାପିଟାଲ ହସ୍ପିଟାଲରେ ଗତ ୬ ମାସ( ଏପ୍ରିଲ- ସେପ୍ଟେମ୍ବର) ମଧ୍ୟରେ ୪୯୮୧୦୦ ଜଣ ରୋଗୀ ଓପିଡିରେ ଚିକିତ୍ସିତ ହୋଇଥିବା ବେଳେ ଆଇପିଡିରେ ୫୩୫୫୦ ଜଣ ରୋଗୀ ଚିକିତ୍ସିତ ହୋଇଛନ୍ତି। ଦୈନିକ ପ୍ରାୟ ୩ ହଜାରରୁ ଅଧିକ ରୋଗୀ ହସ୍ପିଟାଲକୁ ଆସୁଥିବା ଜଣାପଡିଛି। ପିପିପି ମୋଡରେ ସିଟି ସ୍କାନ, ଡାଇଲିସିସି ଏବଂ ନିଦାନ କରାଯାଉଥିବା ବେଳେ କ୍ୟାପିଟାଲ ହସ୍ପିଟାଲରେ ଗତ ୬ ମାସ ଭିତରେ ପ୍ରାୟ ୬୧୪୦ ରୋଗୀ ଏହା ମାଧ୍ୟମରେ ଉପକୃତ ହୋଇଛନ୍ତି। ଏହା ସହ ମୋଟ ୫୯୧୪ ଜଣ ଡାଇଲିସିସି ହୋଇଥିବା ବେଳେ ନିଦାନରେ ୧୧୫୭୨ ଜଣ ରୋଗୀ ଚିକିତ୍ସିତ ହୋଇଥିବା ଜଣାପଡିଛି।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ