ଭୁବନେଶ୍ବର: ନିକଟରେ ଉଭୟ ରାଜ୍ୟ ଓ କେନ୍ଦ୍ରୀୟ ସ୍ତରରେ ବିଜେପିର ନୂଆ ମଙ୍ଗୁଆଳ ଦାୟୀତ୍ବ ଗ୍ରହଣ କରିବା ପରେ ପୁଣି ଥରେ ଦମ୍ଭ ଦେଖାଇଛି ବିଜେପି। ନୂତନ ଭାବେ ଦାୟୀତ୍ବ ଗ୍ରହଣ କରିଥିବା ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେ ପି ନଡ୍ଡାଙ୍କ ଫୋକସରେ ଅଣ ବିଜେପି ଶାଶିତ ରାଜ୍ୟ ଥିବା ଦର୍ଶାଇବାରୁ ଏହାକୁ ନେଇ ରାଜ୍ୟ ରାଜନୀତିରେ ଚର୍ଚ୍ଚା ଆରମ୍ଭ ହୋଇଯାଇଛି।
ଏପଟେ ରାଜ୍ୟରେ ମଧ୍ୟ ବିଜେପିର ନୂଆ ମଙ୍ଗୁଆଳ ଭାବେ ସମୀର ମହାନ୍ତି ଦାୟୀତ୍ବ ନେଇ ଦଳର ସଙ୍ଗଠନକୁ ଅଧିକ ସୃଦୃଢ କରିବା ସହ ଜନତାଙ୍କ ଆସ୍ଥା ଭାଜନ ଉପରେ ଗୁରୁତ୍ବ ଦେଇଛନ୍ତି। ଯାହାକି ଓଡିଶା ଉପରେ ପୁଣି ଥରେ ବିଜେପି ଫୋକସ କରିଥିବା କୁହାଯାଉଛି।
ହେଲେ ବିଜେପିର ଏଭଳି ଫୋକସ ମନ୍ତ୍ବବ୍ୟକୁ କଂଗ୍ରେସ ଓ ବିଜେଡି ହାଲକା ଭାବେ ନେଇଛନ୍ତି। କଂଗ୍ରେସ ବିଧାୟକ ସୁରେଶ ରାଉତରାୟ ନଡ୍ଡାଙ୍କ ମନ୍ତବ୍ୟକୁ କଟାକ୍ଷ କରିଛନ୍ତି। 2024ରେ ନା ନବୀନ ନା ମୋଦି, କଂଗ୍ରେସ କରିବ ସରକାର। ପଦ୍ମରୁ ପାଖୁଡା ଖସିଛି, କେବଳ କେଶର ଅଛି ବୋଲି କହିଛନ୍ତି ସେ।
ସେପଟେ ଥରେ ପ୍ରମାଣିତ ହୋଇସାରିବା ପରେ ଓଡିଶା ଉପରେ ଫୋକସ କରିବାର ଅର୍ଥ କ’ଣ? ଯଦି ବିକାଶ ଦୃଷ୍ଟିରୁ ଫୋକସ କରିବାକୁ ଚାହୁଁଛନ୍ତି, ଓଡିଶା ଲଗାତାର ଭାବେ ଯେଉଁ ଦାବି କରୁଛି ତାହା ଉପରେ ଫଳପ୍ରଦ ନିଷ୍ପତ୍ତି ନିଅନ୍ତୁ । ଯଦି ରାଜନୈତିକ ଅସ୍ଥିରତା ପାଇଁ ଫୋକସ କରୁଥାନ୍ତି ତାହା କେବେ ଫଳପ୍ରଦ ହେବ ନାହିଁ ବୋଲି ବିଜେଡି ବିଧାୟକ ଶଶୀଭୂଷଣ ବେହେରା କହିଛନ୍ତି।
ଓଡିଶା ଦଖଲ ବିଜେପିର ନୂଆ ଟାର୍ଗେଟ, ହେବେ କି ସଫଳ ? ଦେଶରେ 70 ପ୍ରତିଶତ ରାଜ୍ୟରେ ଶାସନ କରୁଥିବା ବିଜେପି ଏବେ 35 ପ୍ରତିଶତରେ ପହଞ୍ଚିଛି । ସେହିପରି 2019 ସାଧାରଣ ନିର୍ବାଚନ ପୂର୍ବରୁ ବିଜେପି ଫୋକସରେ ଓଡଶା ଥିବାବେଳେ ଦଳ ମିଶନ 120 ପ୍ଲସ ନାରା ଦେଇଥିଲା। ହେଲେ ନିର୍ବାଚନର ଫଳାଫଳ ପରେ ସବୁ ଆଶା ଧୁଳିସାତ୍ ହୋଇଥିଲା। ଏବେ କିନ୍ତୁ ସ୍ଥିତି ଭିନ୍ନ ରହିଛି। ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ମଧ୍ୟରେ ନିବିଡତା ବଢିଛି, ଅନ୍ୟ ଅଣ ବିଜେପି ଶାସିତ ରାଜ୍ୟରେ ବିଜେପି ଯେମିତି ଲଢେଇ ଜାରିରଖିଛି, ଓଡିଶାରେ ସେଭଳି କିଛି ଦେଖିବାକୁ ମିଳୁନାହିଁ ।
ଏଭଳି ସ୍ଥିତିରେ କେନ୍ଦ୍ର ଓ ରାଜ୍ୟର ନୂଆ ବିଜେପି ମଙ୍ଗୁଆଳଙ୍କ ମନ୍ତବ୍ୟ କର୍ମୀଙ୍କ ମନରେ କି ପ୍ରକାର ଉତ୍ସାହ ଭରିଦେଉଛି ତାହା ଆଗାମୀ ଦିନରେ ହେବାକୁ ଥିବା ପୌର ନିର୍ବାଚନରେ ପ୍ରମାଣିତ ହେବ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
