ସେସୁ ବିଜୁଳି କାଟିବା ପ୍ରସଙ୍ଗ: ସରକାରଙ୍କୁ ଘେରିଲା ବିଜେପି

ଆସନ୍ତା 16 ତାରିଖରୁ ସେସୁ ପକ୍ଷରୁ ବିଜୁଳି କାଟିବା ପ୍ରସଙ୍ଗରେ ପ୍ରଶ୍ନ ଉଠାଇଲା ରାଜ୍ୟ ବିଜେପି । ବିଜୁଳି ବିଲ୍‌ ସଂଗ୍ରହ ହେଉ ଆପତ୍ତି ନାହିଁ ହେଲେ ପ୍ରଥମେ ବାକି ରଖିଥିବା ବଡ ବଡ ଶିଳ୍ପାନୁଷ୍ଠାନଙ୍କ ଠାରୁ କାହିଁକି ବିଜୁଳି କର ଆଦାୟ କରୁନାହାଁନ୍ତି ରାଜ୍ୟ ସରକାର ବୋଲି ବିଜେପି ନେତ୍ରୀ ଲେଖାଶ୍ରୀ ସାମନ୍ତସିଂହାର ପଚାରିଛନ୍ତି ।

ଭୁବନେଶ୍ବର: ଆସନ୍ତା 16 ତାରିଖରୁ ସେସୁ ପକ୍ଷରୁ ବିଜୁଳି କାଟିବା ପ୍ରସଙ୍ଗରେ ପ୍ରଶ୍ନ ଉଠାଇଲା ରାଜ୍ୟ ବିଜେପି । ବିଜୁଳି ବିଲ୍‌ ସଂଗ୍ରହ ହେଉ ଆପତ୍ତି ନାହିଁ ହେଲେ ପ୍ରଥମେ ବାକି ରଖିଥିବା ବଡ ବଡ ଶିଳ୍ପାନୁଷ୍ଠାନଙ୍କ ଠାରୁ କାହିଁକି ବିଜୁଳି କର ଆଦାୟ କରୁନାହାଁନ୍ତି ରାଜ୍ୟ ସରକାର ବୋଲି ବିଜେପି ନେତ୍ରୀ ଲେଖାଶ୍ରୀ ସାମନ୍ତସିଂହାର ପଚାରିଛନ୍ତି । ମଙ୍ଗଳବାର ଭୁବନେଶ୍ବର ବିଜେପି ରାଜ୍ୟ କାର୍ଯ୍ୟାଳୟରେ ସାମ୍ବାଦିକ ସମ୍ମିଳନୀ କରି ସେ ଏପରି ଅଭିଯୋଗ କରିଛନ୍ତି ।

ରାଜ୍ୟ ସରକାର ଗରିବ ଜନସାଧାରଣଙ୍କ ଉପରେ ଦାଉ ନସାଧୁ। ଆଗକୁ ରାଜ୍ୟରେ ପରୀକ୍ଷା ଋତୁ ଆସୁଛି, ସେସୁର ଲାଇନ କାଟିବା ନିଷ୍ପତ୍ତି ଦୁର୍ଭାଗ୍ୟଜନକ, ଏହାଦ୍ବାରା ଗାଁ ଗହଳିରେ ରହୁଥିବା ଛାତ୍ରଛାତ୍ରୀ ହଇରାଣ ହେବେ ବୋଲି କହିଛନ୍ତି ସେ ।

ସେହିପରି ଗୋଟିଏ ପଟେ ରାଜ୍ୟ ସରକାର ବିଜୁଳି ବଳକା ରାଜ୍ୟ ବୋଲି କହୁଛନ୍ତି, ଅନ୍ୟପଟେ ବିଜୁଳି କାଟିବା ନିଷ୍ପତ୍ତି ନେଉଛନ୍ତି । ସରକାରଙ୍କ ଦାୟିତ୍ବ ଲୋକଙ୍କୁ ମୌଳିକ ସୁବିଧା ପ୍ରଦାନ କରିବା କିନ୍ତୁ ବିଜୁଳି ଭଳି ଅତ୍ୟାବଶ୍ୟକ ମାଧ୍ୟମକୁ କାଟିବାକୁ କହୁଛନ୍ତି । ଅନ୍ତତଃ ସରକାର ବିଜୁଳି କାଟିବା ପୂର୍ବରୁ ଲୋକଙ୍କ ସହ ଆଲୋଚନା କରନ୍ତୁ, ଲୋକଙ୍କ ଦେୟ ଦାଖଲ କ୍ଷମତା ଅଛି କି ନାହିଁ ତର୍ଜମା କରନ୍ତୁ ବୋଲି ଲେଖାଶ୍ରୀ ଦର୍ଶାଇଛନ୍ତି ।

ଏହାସହ କଣ ପାଇଁ ବକେୟା ଥିବା ଶିଳ୍ପାନୁଷ୍ଠାନ ପ୍ରତି କାର୍ଯ୍ୟାନୁଷ୍ଠାନ ନକରି ସାଧାରଣ ଲୋକଙ୍କ ଲାଇନ କାଟିବା କଥା କହୁଛନ୍ତି ତାହା ସ୍ପଷ୍ଟ କରନ୍ତୁ ବୋଲି ସେ ଦାବି କରିଛନ୍ତି।

ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ