ଭୁବନେଶ୍ବର:ଆଗାମୀ ପୌର ନିର୍ବାଚନରେ ବିଜେପି ଏବଂ କଂଗ୍ରେସର ମେୟର ଚେହେରା ନୂଆ ରହିଛି । ମାତ୍ର ବିଜୁ ଜନତା ଦଳର ପ୍ରାର୍ଥିନୀ ସୁଲୋଚନା ଦାସ ପୂର୍ବରୁ ରାଜନୀତିରେ ସକ୍ରିୟ ରହିଛନ୍ତି । ସୁନୀତି ମୁଣ୍ଡକୁ ଏଥର ଭୁବନେଶ୍ବର ମେୟର ପ୍ରାର୍ଥୀ ଘୋଷଣା କରିଛି ବିଜେପି । ଯିଏ କି ଜଣେ ଲେଖିକା । ଆସନ୍ତା ପୌର ନିର୍ବାଚନରେ ଜିତିବେ ବୋଲି ସୁନୀତି ଆଶା ରଖିଛନ୍ତି ଏବଂ ଜନସମର୍ଥନ ମିଳୁଥିବାର ମଧ୍ୟ କହିଛନ୍ତି । ସେ ମେୟର ହେଲେ ଭୁବନେଶ୍ବର ବିକାଶ ପାଇଁ ଭେଣ୍ଡିଂ ଜୋନଠୁ ଆରମ୍ଭ କରି ବସ୍ତିବାସିନ୍ଦାଙ୍କ ଲାଗି ସ୍ଥାୟୀ ଘର ଏବଂ ଡ୍ରେନେଜ ବ୍ୟବସ୍ଥା ଯାଏଁ ନାନା ସମସ୍ୟାର ସମାଧାନ କରିବେ ।
କେନ୍ଦ୍ର ସରକାରଙ୍କ ଆୟୁଷ୍ମାନ ଯୋଜନା ଏବଂ ଅମୃତ ଯୋଜନା ରାଜଧାନୀରେ କାର୍ଯ୍ୟକାରୀ କରିବା ଦିଗରେ ଅଗ୍ରାଧିକାର ଦେବେ । ତେଣୁ ତାଙ୍କୁ ଥରେ ସୁଯୋଗ ଦେବାକୁ ଲୋକଙ୍କୁ ନିବେଦନ କରିଛନ୍ତି ବିଜେପି ମେୟର ପ୍ରାର୍ଥୀ । ଏଥିସହ ସୁନୀତି ମୁଣ୍ଡ ବିଜେଡିର ଦୀର୍ଘ ବର୍ଷର ଶାସନ ଉପରେ ପ୍ରଶ୍ନ ଉଠାଇଛନ୍ତି । ଭୁବନେଶ୍ବର ସ୍ମାର୍ଟସିଟି ବୋଲାଉ ଥିବାବେଳେ ୨୨ ବର୍ଷ ହେଲା ବିକାଶର ନା ଗନ୍ଧ ନାହିଁ ବୋଲି ସେ ସମାଲୋଚନା କରିଛନ୍ତି ।