ଭୁବନେଶ୍ବର: ଆଉ କିଛି ସମୟ ପରେ ଓଡିଶାରେ ପହଞ୍ଚିବେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ । ଦୁଇ ଦିନିଆ ଓଡ଼ିଶା ଗସ୍ତରେ ଥିବା ଅମିତ ଶାହଙ୍କ ଭବ୍ୟ ସ୍ବାଗତ ପାଇଁ ବିଜେପି ପୁରା ପ୍ରସ୍ତୁତ । ନେତାଙ୍କଠାରୁ ନେଇ କର୍ମୀଙ୍କ ପର୍ଯ୍ୟନ୍ତ ସମସ୍ତଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଛି । ପାର୍ଟି ଅଫିସ ଆଗରେ ଶାହାଙ୍କୁ ସ୍ଵାଗତ ସମ୍ବର୍ଦ୍ଧନା ପାଇଁ ଦଳ ପ୍ରସ୍ତୁତ ହୋଇଛି ।
ଦଳ ଉପରେ ପଡ଼ିବ ଅମିତଙ୍କ ଗସ୍ତର ପ୍ରଭାବ
ବିଜେପି ସାଧାରଣ ସମ୍ପାଦକ ପୃଥ୍ବୀରାଜ ହରିଚନ୍ଦନ କହିଛନ୍ତି, "୨୦୧୭ରେ ଓଡିଶା ପ୍ରଦେଶର ସଂଗଠନକୁ ଏକ ପୁନର୍ବିନ୍ୟାସ କରିବା ପାଇଁ ଅମିତ ଶାହଙ୍କ ଯୋଜନା ଆରମ୍ଭ କରିଥିଲେ । ସେ ଦୃଷ୍ଟିରୁ ଦଳର ସମସ୍ତ କର୍ମୀଙ୍କ ସହ ତାଙ୍କର ଏକ ଭାବଗତ ସମ୍ପର୍କ ଯୋଡି ହୋଇ ରହିଛି । ଦଳ ଉପରେ ଏବଂ ଦଳୀୟ କାର୍ଯ୍ୟକର୍ତ୍ତାଙ୍କ ମାନସିକତା ଉପରେ ଅମିତ ଶାହଙ୍କ ଗସ୍ତ ନିଶ୍ଚିତ ଭାବେ ପ୍ରଭାବ ପକାଇବ ।"