ଭୁବନେଶ୍ବର: ବିଜେପି ଓ କଂଗ୍ରେସ ପରେ ବିଜେଡି ପ୍ରକାଶ କରିଛି ଚଳିତ ସାଧାରଣ ନିର୍ବାଚନ ପାଇଁ ନିଜର ନିର୍ବାଚନୀ ଇସ୍ତାହାର। ନବୀନ ଓଡିଶା ଓ ସଶକ୍ତ ଓଡିଶା ଗଠନର ପ୍ରତିଶ୍ରତି ଦେଇ ଘୋଷଣା ପତ୍ର ଜାରି କରିଛି ବିଜେଡି। ବିଜେଡି 2014 ନିର୍ବାଚନ ଇସ୍ତାହାରରେ ଦେଇଥିବା ସବୁ ପ୍ରତିଶ୍ରୁତି ପାଳନ କରିଛି । 2019ର ଇସ୍ତାହାରରେ ଦିଆଯାଇଥିବା ପ୍ରତିଶ୍ରୁତି ମଧ୍ୟ ପାଳନ କରିବ । ଅନ୍ୟ ଦଳ ବିଶେଷ କରି ବିଜେପି ପରି ନିର୍ବାଚନୀ ପ୍ରତିଶ୍ରୁତି ପାଳନରୁ ଓହରିବ ନାହିଁ ବିଜେଡି । ନିର୍ବାଚନ ଇସ୍ତାହାର ପ୍ରକାଶ କରି ବିଜେଡି ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହା କହିଛନ୍ତି।
ବିଜେଡିର ନିର୍ବାଚନ ଇସ୍ତାହାରରେ କୃଷି, ମହିଳା, ଚାଷୀ ଓ ଯୁବଗୋଷ୍ଠୀଙ୍କ ସଶକ୍ତିକରଣକୁ ପ୍ରାଧାନ୍ୟ ଦିଆଯାଇଛି। ନିର୍ବାଚନର କିଛି ମାସ ପୂର୍ବରୁ ଆରମ୍ଭ ହୋଇଥିବା କାଳିଆ ଯୋଜନା ଏବେ ଏକ ନିୟମିତ ଯୋଜନାରେ ପରିଣତ ହେବ। ସରକାରକୁ ଫେରିଲେ ଏହା କାର୍ଯ୍ୟକାରୀ ହେବ। ଯୋଜନାର କାର୍ଯ୍ୟକାରିତାକୁ ସମୀକ୍ଷା କରିବା ଏବଂ ଆବଶ୍ୟକତା ମୁତାବକ ପରାମର୍ଶ ଦେବାକୁ ଗଠନ ହେବ କାଳିଆ କମିଶନ। ଏହି ଯୋଜନାରେ 50 ହଜାର ଟଙ୍କା ପର୍ଯ୍ୟନ୍ତ ସୁଧବିହିନ ଋଣ ସୁବିଧାକୁ ଏକ ଲକ୍ଷ ଟଙ୍କା ପର୍ଯ୍ୟନ୍ତ ସଂପ୍ରସାରିତ କରାଯିବ। କୃଷିର ବିକାଶ ପାଇଁ ଜଳସେଚନରେ 50ହଜାର କୋଟି ଟଙ୍କା ବିନିଯୋଗ କରି ସବୁ ଅଞ୍ଚଳକୁ ଜଳସେଚନ ସୁବିଧା ସୃଷ୍ଟି କରାଯିବ। ଜନମତ ଆଧାରରେ ସୃଷ୍ଟି ହୋଇଥିବା ଏହି ଇସ୍ତାହାରରେ କାଳିଆ ସହ ମମତା, ଆହାର, ବିଜୁ ସ୍ବାସ୍ଥ୍ୟ କଲ୍ୟାଣ, ମିଶନ ଶକ୍ତି, ଆମ ଗାଁ ଆମ ବିକାଶ, ପିଠା ଆଦି ଯୋଜନା ପୂର୍ବଭଳି ଜାରି ରହିବ ବୋଲି କହିଛନ୍ତି ଦଳର ଇସ୍ତାହାର କମିଟି ଆବାହକ ଅମର ପଟ୍ଟନାୟକ।
ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାରେ ମହିଳାଙ୍କ ପାଇଁ 7 ଲକ୍ଷ ପରିବର୍ତ୍ତେ 10 ଲକ୍ଷ ଟଙ୍କା ପର୍ଯ୍ୟନ୍ତ ମାଗଣା ସ୍ବାସ୍ଥ୍ୟ ସେବା ଯୋଗାଇ ଦିଆଯିବ । ‘ମିଶନ ଶକ୍ତି’ ଏକ ନୂଆ ବିଭାଗ ଭାବେ କାର୍ଯ୍ୟ କରିବ। ସବୁ ପଞ୍ଚାୟତରୁ ଆରମ୍ଭ କରି ସଚିବାଳୟ ପର୍ଯ୍ୟନ୍ତ ଗଠନ ହେବ ମିଶନ ଶକ୍ତି ଫେଡେରେସନ । ଏଣିକି ସମାଜର ଅନଗ୍ରସର ଶ୍ରେଣୀକୁ ଜମି କିମ୍ବା ଘର ଦିଆଗଲେ ତାହା ସଂପୃକ୍ତ ପରିବାରର ମହିଳାଙ୍କ ନାଁରେ ଦିଆଯିବ ବୋଲି ଇସ୍ତାହାରରେ ପ୍ରତିଶ୍ରତି ଦିଆଯାଇଛି।