ଭୁବନେଶ୍ବର: ପବିତ୍ର ଗଣେଶ ଚତୁର୍ଥୀରୁ ବିଜେଡି ଆରମ୍ଭ କରିଛି ସଭ୍ୟ ସଂଗ୍ରହ ଅଭିଯାନ । ମୁଖ୍ୟମନ୍ତ୍ରୀ ତଥା ବିଜେଡି ସଭାପତି ନବୀନ ପଟ୍ଟନାୟକ ଦଳୀୟ କାର୍ଯ୍ୟାଳୟରେ ଏହି ଅଭିଯାନର ଶୁଭାରମ୍ଭ କରିଛନ୍ତି। ଏଥି ସହ ନିଜେ ନବୀନ ହେଲେ ପ୍ରଥମ ସଭ୍ୟ ସଦସ୍ୟ । ଅକ୍ଟୋବର ୩୧ ଯାଏ ଚାଲିବ ଏହି ସଭ୍ୟ ସଂଗ୍ରହ ଅଭିଯାନ।
ସୋମବାର ଆରମ୍ଭ ହୋଇଛି ବିଜେଡିର ସଭ୍ୟ ସଂଗ୍ରହ ଅଭିଯାନ । ସୁପ୍ରିମୋ ନବୀନ ପଟ୍ଟନାୟକଙ୍କ ଠାରୁ ସଭ୍ୟ ସଂଗ୍ରହ ଅଭିଯାନ ଆରମ୍ଭ କରିଛି ବିଜେଡି । ସଭ୍ୟ ସଂଗ୍ରହ ରସିଦ୍ ନିଜେ କାଟିଛନ୍ତି ମୁଖ୍ୟମନ୍ତ୍ରୀ। ସେ ନିଜେ ସକ୍ରିୟ ସଭ୍ୟ ହେବା ସହିତ 24 ଜଣ ସଭ୍ୟ ସଂଗ୍ରହ କରିଥିଲେ । ଏହି କାର୍ଯ୍ୟକ୍ରମକୁ ଉଦ୍ଘାଟନ କରି ନବୀନ ଗାଁକୁ ଯିବାକୁ କର୍ମୀଙ୍କୁ ଆହ୍ବାନ କରିଛନ୍ତି । ଗାଁକୁ ଯାଇ ମହିଳା, ସାଧାରଣ ଲୋକ ଓ କୃଷକଙ୍କ ସହ କଥା ହେବା ପାଇଁ ପରାମର୍ଶ ଦେଇଛନ୍ତି ।
ବିଜେଡିର ସଭ୍ୟ ସଂଗ୍ରହ ଅଭିଯାନ ଶୁଭାରମ୍ଭ
ଅକ୍ଟୋବର 2 ଗାନ୍ଧୀ ଜୟନ୍ତୀରୁ ଦଳର ପଦଯାତ୍ରା ଥିଲେ ବି ଏହି ସମୟରେ ସଭ୍ୟ ସଂଗ୍ରହ ଅଭିଯାନକୁ ଆହୁରି ଜୋରଦାର କରାଯିବ ବୋଲି ଦଳ ନିଷ୍ପତ୍ତି ନେଇଛି । ମାତ୍ର 5 ଟଙ୍କା ଦେଇ ଜଣେ ସଭ୍ୟ ହୋଇପାରିବେ । 2 ମାସ ମଧ୍ୟରେ 1 କୋଟି ସଭ୍ୟ ସଂଗ୍ରହ ଲକ୍ଷ୍ୟ ରଖିଛି ଦଳ। ଯୁବକ, ମହିଳା, ଚାଷୀ ସମସ୍ତଙ୍କୁ ସଭ୍ୟ କରି ଦଳ ନିଜ ସ୍ଥିତି ସୁଦୃଢ କରିବାକୁ ଲକ୍ଷ ରଖିଛି । ଯେଉଁମାନେ ସଭ୍ୟ ହେବେ ସେମାନଙ୍କ ଆଧାର ନମ୍ବର ସଂଯୋଗ କରିବାକୁ ପଡିବ। ଫଳରେ ଦଳ ଏଜ୍ ଡାଟାବେସ ପ୍ରସ୍ତୁତ କରି ରଖିବାରେ ଏହା ସହାୟକ ହେବ ବୋଲି କୁହାଯାଇଛି।
ୱେବ୍ ପୋର୍ଟାଲ ଓ ଆପ୍ ଜରିଆରେ ଏହି ସଭ୍ୟ ସଂଗ୍ରହକୁ ଦେଶ ତଥା ଦେଶ ବାହାରକୁ ନେବା ପାଇଁ ଦଳ ଯୋଜନା କରିଛି । ଆସନ୍ତା 7 ରେ ଦଳ ଜଏନ୍ ବିଜେଡି ଆପ୍ ଉନ୍ମୋଚନ କରିବ । ଏଥିସହିତ www.joinbjd.com ପୋର୍ଟାଲ ଜରିଆରେ ବି ଜଣେ ବିଜେଡି ସଭ୍ୟ ହୋଇପାରିବ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
