ରାଜଧାନୀରେ ପୁଣି 10 ସ୍ଥାନୀୟ ସଂକ୍ରମଣ ସହ 17 ଆକ୍ରାନ୍ତ ଚିହ୍ନଟ

ରାଜଧାନୀରେ କାୟା ବିସ୍ତାର କରିବାରେ ଲାଗିଛି ସ୍ଥାନୀୟ ସଂକ୍ରମଣ । ଏନେଇ ଗତ 24 ଘଣ୍ଟା ମଧ୍ୟରେ ପୁଣି 10ଟି ସ୍ଥାନୀୟ ସଂକ୍ରମଣ ସହ ମୋଟ 17ଟି ମାମଲା ସାମ୍ନାକୁ ଆସିଛି ।

ଭୁବନେଶ୍ବର: ରାଜଧାନୀରେ କାୟା ବିସ୍ତାର କରିବାରେ ଲାଗିଛି ସ୍ଥାନୀୟ ସଂକ୍ରମଣ । ଏନେଇ ଗତ 24 ଘଣ୍ଟା ମଧ୍ୟରେ ପୁଣି 10ଟି ସ୍ଥାନୀୟ ସଂକ୍ରମଣ ସହ ମୋଟ 17ଟି ମାମଲା ସାମ୍ନାକୁ ଆସିଛି । ଗୋଟିଏପଟେ ଖୋର୍ଦ୍ଧାରେ 21 ଜଣ ଆକ୍ରାନ୍ତ ଚିହ୍ନଟ ହୋଇଥିବା ବେଳେ କେବଳ ଭୁବନେଶ୍ବରରେ 17 ଆକ୍ରାନ୍ତ ଚିହ୍ନଟ ହୋଇଛନ୍ତି । ସଦ୍ୟ ଚିହ୍ନଟ ଆକ୍ରାନ୍ତଙ୍କ ମଧ୍ୟରେ 10ଟି ସ୍ଥାନୀୟ ସଂକ୍ରମଣ ହୋଇଥିବା ବେଳେ କ୍ବାରେଣ୍ଟାଇନ ସେଣ୍ଟରରୁ 5 ଓ କୋଭିଡ ହସ୍ପିଟାଲରୁ 2 ଜଣ କର୍ମଚାରୀ ପଜିଟିଭ ଚିହ୍ନଟ ହୋଇଛନ୍ତି ।

ରାଜଧାନୀରେ ପୁଣି 10 ସ୍ଥାନୀୟ ସଂକ୍ରମଣ ସହ 17 ଆକ୍ରାନ୍ତ ଚିହ୍ନଟ

କ୍ବାରେଣ୍ଟାଇନ ସେଣ୍ଟରରୁ ଚିହ୍ନଟ 5 ଜଣ ଆକ୍ରାନ୍ତଙ୍କ ମଧ୍ୟରେ ପଟିଆ ଅଞ୍ଚଳରୁ 2 ଜଣ ଓ ୟୁନିଟ 4 ଏମଏଲଏ କଲୋନୀ, ଚନ୍ଦ୍ରଶେଖରପୁର ଓ ଜୟଦେବ ବିହାରରୁ ଜଣେ ଲେଖାଏଁ ରହିଛନ୍ତି । ସେପଟେ ଚିହ୍ନଟ ହୋଇଥିବା ସ୍ଥାନୀୟ ସଂକ୍ରମଣ ମଧ୍ୟରେ ଡୁମଡୁମା ଅଞ୍ଚଳର ରଘୁନାଥ ବସ୍ତିରୁ 2 ଜଣ, ସରକାରୀ ହସ୍ପିଟାଲରର 2 ଜଣ କର୍ମଚାରୀ, ପଟିଆ ଜଗନ୍ନାଥ ମନ୍ଦିର, ପାଣିଟାଙ୍କି ବସ୍ତି, ଦାସପୁର ଅନ୍ଧାରୁଆ ଅଞ୍ଚଳ, ସତ୍ୟବାଦୀ ନଗର ଲେନ 1, ଏକ ଘରୋଇ ହସ୍ପିଟାଲ ଓ ଚକେଇସିଆଣି ଅଞ୍ଚଳରୁ ଜଣେ ଲେଖାଏଁ ରହିଛନ୍ତି ।

ଏସବୁ ବାଦେ କୋଭିଡ ହସ୍ପିଟାଲରେ କାର୍ଯ୍ୟରତ 2 ଜଣ କର୍ମଚାରୀ ମଧ୍ୟ ପଜିଟିଭ ଚିହ୍ନଟ ହୋଇଛନ୍ତି । ଏଥିସହ ଭୁବନେଶ୍ବରରେ ସୋମବାର 4 ଜଣ ସୁସ୍ଥ ହୋଇଥିବା ଜଣା ପଡିଛି । ଏମାନଙ୍କ ମଧ୍ୟରେ 2 ଜଣ ଘରୋଇ ହସ୍ପିଟାଲ କର୍ମଚାରୀ, ଜଣେ ଡୁମଡୁମା ଅଞ୍ଚଳ ଓ ଜଣେ ରସୁଲଗଡ ଅଞ୍ଚଳର ହୋଇଥିବା ସୂଚନା ରହିଛି । ବର୍ତ୍ତମାନ ସୁଦ୍ଧା ଭୁବନେଶ୍ବରରେ ମୋଟ ଆକ୍ରାନ୍ତ ସଂଖ୍ୟା 450ରେ ପହଞ୍ଚିଥିବା ବେଳେ 274 ଜଣ ସୁସ୍ଥ ହୋଇ ଘରକୁ ଫେରିଛନ୍ତି । ସେପଟେ ଏଯାବତ୍‌ 6 ଜଣଙ୍କର କୋରୋନାରେ ମୃତ୍ୟୁ ହୋଇସାରିବା ବେଳେ 169ଟି ମାମଲା ସକ୍ରିୟ ରହିଛି ।

ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ