ଭୁବନେଶ୍ବର: ଜନ୍ମଦିନରେ କୋଭିଡ ନିୟମ ଉଲ୍ଲଂଘନ କରିଥିବା ଅଭିଯୋଗ ପରେ ବିଜେପି ରାଷ୍ଟ୍ରୀୟ ପ୍ରବକ୍ତା ତଥା ଭୁବନେଶ୍ବର ସାଂସଦ ଅପରାଜିତା ଷଡଙ୍ଗୀ ଡାକିଛନ୍ତି ସାମ୍ବାଦିକ ସମ୍ମିଳନୀ । ଜନ୍ମଦିନ ଅବସରରେ ସେ କୋଭିଡ ନିୟମକୁ ଅବମାନନା କରିନାହାଁନ୍ତି କିମ୍ବା କୈଣସି ନିୟମକୁ ଉଲ୍ଲଂଘନ କରିନାହାଁନ୍ତି ବୋଲି ସିଧା ସାମ୍ବାଦିକ ସମ୍ମିଳନୀରେ ସ୍ପଷ୍ଟୀକରଣ ରଖିଛନ୍ତି ଅପରାଜିତା । ସେପଟେ କୋଭିଡ ନିୟମ ଉଲ୍ଲଙ୍ଘନ ହୋଇଥିବା ନେଇ ବିଜେଡ଼ିର ଅଭିଯୋଗ ହେବା ପରେ ତାଙ୍କ ଅଫିସ ସିଲ କରିଛି ବିଏମସି । ତେବେ ଅଫିସ ସିଲ ହେବା ପରେ ସାମ୍ବାଦିକ ସମ୍ମିଳନୀ ଡାକିଥିଲେ ଭୁବନେଶ୍ବର ସାଂସଦ ଅପରାଜିତା ।
ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ଅଭିଯୋଗ ଏବଂ ବିଏମସିର କାର୍ଯ୍ୟାନୁଷ୍ଠାନ ନେଇ ଅପରାଜିତା କହିଛନ୍ତି, ମୁଁ ଜଣେ ଶିକ୍ଷିତ ଜନପ୍ରତିନିଧି । ମୁଁ ନିୟମ ଏବଂ ଆଇନ ସମ୍ବନ୍ଧରେ ଅବଗତ ଅଛି । କୋଭିଡ ନିୟମ କୌଣସିମତେ ଅବମାନନା କରିନାହିଁ । ଯେଉଁମାନେ ଏପରି ଅଭିଯୋଗ ଆଣୁଛନ୍ତି, ସେମାନେ ପ୍ରଥମେ ନିଜର ଛବି ଦେଖନ୍ତୁ । ଦିବଂଗତ ବିଧାୟକ ପ୍ରଦୀପ ମହାରଥୀଙ୍କ ଶେଷ ଯାତ୍ରାରେ ମନ୍ତ୍ରୀ ସମୀର ଦାସ ଏବଂ ବିଧାୟକ ଉମାକାନ୍ତ ସାମନ୍ତରାୟ ପଜିଟିଭ ଥାଇ ମଧ୍ୟ ହଜାର ହଜାର ଲୋକଙ୍କ ମଧ୍ୟରେ ରହିଥିଲେ । ସେମାନଙ୍କ ବିପରୋଧରେ କଣ ପାଇଁ ସରକାର କୈଣସି କାର୍ଯ୍ୟାନୁଷ୍ଠାନ ଗ୍ରହଣ କରିନାହାଁନ୍ତି ବୋଲି ପାଲଟା ପ୍ରଶ୍ନ ପଚାରିଛନ୍ତି ଅପରାଜିତା ।