ଆୟୁଷ ନିର୍ଦ୍ଦେଶକ ବିଭୂ ପ୍ରସାଦ ଷଡଙ୍ଗୀଙ୍କୁ ସର୍ତ୍ତମୂଳକ ଜାମିନ

19:35 July 13

ଭୁବନେଶ୍ବର: ଜେଲରୁ ମୁକୁଳିଲେ ଆୟୁଷ ନିର୍ଦ୍ଦେଶକ ବିଭୂ ପ୍ରସାଦ ଷଡଙ୍ଗୀ । କାର୍ଯ୍ୟାଳୟରେ ଜନୈକ ମହିଳା କର୍ମଚାରୀଙ୍କୁ ଅଶ୍ଲୀଳ ଭିଡିଓ ପଠାଇବା ଏବଂ ଯୌନ ଶୌଷଣ ଅଭିଯୋଗରେ ତାଙ୍କ ନାମରେ ମାମଲା ରୁଜୁ ହେବା ସହ ସମ୍ପୃକ୍ତ ଓଏସ ଅଫିସରଙ୍କୁ ଗିରଫ କରାଯାଇଥିଲା । ଗିରଫ ପରେ 4 ଦିନ ଧରି ତାଙ୍କୁ ଝାରପଡା ଜେଲରେ ରଖାଯାଇଥିଲା । ହେଲେ ସୋମବାର ତାଙ୍କୁ ଜିଲ୍ଲା ଅତିରିକ୍ତ ଦୌରାଜଜ ସର୍ତ୍ତମୂଳକ ଜାମିନ ପ୍ରଦାନ କରିବା ପରେ ସେ ଜେଲରୁ ମୁକୁଳିଛନ୍ତି ।

ଦୁଇ ଜଣ ଜାମିନଦାର ଓ 10 ହଜାର ଟଙ୍କା ବେଲ ବଣ୍ଡ୍‌ରେ ସେ ମୁକୁଳିଥିବା ଜଣା ପଡିଛି । ସର୍ତ୍ତରେ ସେ ସାକ୍ଷୀଙ୍କୁ ପ୍ରଭାବିତ ନ କରିବା, ଅଭିଯୋଗକାରିଣୀଙ୍କୁ ଧମକ ଚମକ ନ ଦେବା ଓ ତଦନ୍ତକାରୀ ଅଧିକାରୀଙ୍କୁ ସହଯୋଗ କରିବା ସହ ପ୍ରମାଣକୁ ଟାମ୍ପରିଂ ନକରିବାକୁ କୁହାଯାଇଛି ।  

ସୂଚନା ମୁତାବକ ସ୍ବାସ୍ଥ୍ୟ ବିଭାଗ ଅଧିନରେ ଥିବା ଆୟୁଷ ବିଭାଗର ମୁଖ୍ୟ ତଥା ଓଏସ ଅଫିସର ନିଜ ୱାର୍ଡରେ ଜଣେ ମହିଳା କର୍ମଚାରୀଙ୍କୁ ଅଶ୍ଲୀଳ ମେସେଜ ପଠାଇବା ସହ ତାଙ୍କୁ ଏକୁଟିଆ ସ୍ଥାନକୁ ଡାକିଥିବା ଅଭିଯୋଗ ହୋଇଥିଲା । କେବଳ ସେତିକି ନୁହେଁ ତାଙ୍କର ଯୌନ ଶୋଷଣ ହେଉଥିବା ମଧ୍ୟ ଅଭିଯୋଗ ହୋଇଥିଲା । ଏନେଇ ସମ୍ପୃକ୍ତ ପୀଡିତାଙ୍କ ମହିଳାଥାନାରେ ଅଭିଯୋଗକ୍ରମେ ଗତ 9 ତାରିଖରେ ଧାରା 354(ଡି), 294, 506, 507, 509, ଆଟି ଆକ୍ଟ 67, 67(ଏ)ରେ ବିଭୂ ପ୍ରସାଦଙ୍କୁ ଗିରଫ କରାଯାଇଥିଲା । ପରେ ତାଙ୍କୁ କୋର୍ଟ ଚାଲାଣ ମଧ୍ୟ କରାଯାଇଥିଲା ।  

ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ