ଭୁବନେଶ୍ବର: ନୟାପଲ୍ଲୀ ଥାନା ଅଞ୍ଚଳରେ ପୁଣି ମାତିଲେ ଅପରାଧୀ ଗ୍ୟାଙ୍ଗ । କେତେବେଳେ ଲୁଟ ପାଟ ତ ଆଉ କେତେବେଳେ ଡକାୟତି କରି ଆତଙ୍କ ଖେଳାଉଛନ୍ତି । ଆଉ କେତେବେଳେ ଯୁବକଙ୍କୁ ହାଣି ଲହୁ ଲୁହାଣ କରୁଛନ୍ତି । ପୁଣି ଥରେ ନୟାପଲ୍ଲୀ ଅଞ୍ଚଳରେ ଏପରି ଘଟଣା ଦେଖିବାକୁ ମିଳିଛି ।
ମଙ୍ଗଳବାର ରାତିରେ ଜଣେ ଓଲା ଡ୍ରାଇଭରଙ୍କୁ ଆକ୍ରମଣ କରି ତାଙ୍କର ଜଣେ ବନ୍ଧୁଙ୍କୁ ଅପହରଣ କରିନେଇଥିବା ନୟାପଲ୍ଲୀ ଥାନାରେ ଅଭିଯୋଗ ହୋଇଛି । ଆକ୍ରମଣର ଶିକାର ହେଇଥିବା ଯୁବକ ଜଣଙ୍କ ହେଲେ ବାଲେଶ୍ବରର ଦିବାକର ବେହେରା । ଦିବାକର ନୟାପଲ୍ଲୀ ଏନ 3 ଅଞ୍ଚଳରେ ରହି ଆସୁଥିଲେ ।
ତେବେ ମଙ୍ଗଳବାର ରାତିରେ ଦିବାକରକୁ ଏକ ଫୋନ କଲ ଆସିଥିଲା । ଜଣେ ଗ୍ରାହକ ପଟିଆ ଯିବା ପାଇଁ କହିଥିଲା । ଦିବାକର ମନା କରିବାରୁ ମୁଁ ପଟିଆ ଟୋକା ପଟିଆକୁ ଆସିଲେ ଦେଖିନେବି ବୋଲି ଧମକ ଦେଇଥିବା ଅଭିଯୋଗ ହୋଇଛି । ତେବେ ପ୍ରାୟ ଘଣ୍ଟାଏ ପରେ ଦିବାକର ଓ ତାଙ୍କ ସାଙ୍ଗ ଏକ ବାଇକ ସାହାଯ୍ୟରେ ଜୟଦେବ ବିହାରକୁ ଯାଇଥିଲେ ।
ପୂର୍ବରୁ ଥିବା ଦୁଇ ଜଣ ଦୁର୍ବୃତ୍ତ ଦିବାକରଙ୍କୁ ହାତରେ ପିନ୍ଧିଥିବା କଡାରେ ଆକ୍ରମଣ କରିଥିଲେ ଓ ପରେ ଦିବାକରଙ୍କ ସାଙ୍ଗକୁ ଅପହରଣ କରି ନେଇଥିଲେ । ଅନ୍ୟପଟେ ଦିବାକର ଆକ୍ରମଣର ଶିକାର ହୋଇ ତଳେ ପଡିଯିବାରୁ ପିସିଆର ଯୋଗେ କ୍ୟାପିଟାଲ ହସ୍ପିଟାଲ ନିଆଯାଇଥିଲା । ପରେ ନୟାପଲ୍ଲୀ ଥାନାରେ ଏକ ଅଭିଯୋଗ କରିଥିଲେ ଦିବାକର ।
ଭୁବନେଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
