ଭୁବନେଶ୍ବର: ପ୍ରଧାନମନ୍ତ୍ରୀ ଆବାସ ଯୋଜନା ଠୁ ଆରମ୍ଭକରି ଲୋକଙ୍କୁ ସରକାରୀ ଓ ବେସରକାରୀ ଯୋଜନା ପହଞ୍ଚାଇବା ନେଇ ବିଏମସି ଡିଣ୍ଡିମ ପିଟୁଛି , କିନ୍ତୁ ଏ ନେଇ ବ୍ୟାପକ ଅନିୟମିତତା ଓ କର୍ତ୍ତୃପକ୍ଷଙ୍କ ମନୋମୁଖୀ କାର୍ଯ୍ୟ କଳାପ ସାମ୍ନାକୁ ଆସିଛି ଯାହାର ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି ଭୁବନେଶ୍ୱର ୱାର୍ଡ ନଂ୨୬ ସାଲିଆ ସାହିର ଗୁନିତା ରାଉଳଙ୍କ କ୍ଷେତ୍ରରେ । ଦୀର୍ଘ ୩ ବର୍ଷ ହେବ ରାସନ କାର୍ଡ଼ ପାଇଁ ବିଏମସିକୁ ଦୌଡ଼ି ଦୌଡ଼ି ସେ ହତାଶ ହୋଇଗଲେଣି।
ଭୁବନେଶ୍ୱରରେ ଜନସାଧାରଣଙ୍କ ସେବା ପାଇଁ ଉଦ୍ଦିଷ୍ଟ ସମସ୍ତ ଯୋଜନାକୁ ବିଏମସି ଯୋଗାଇ ଦେବ ବୋଲି ପ୍ରତିଶ୍ରୁତି ଦେଇଥିବା ବେଳେ, ଏଭଳି ଦୁଃଖଦ ଘଟଣା ବିଏମସିର ଅସଲ ମୁଖା ଖୋଲି ଦେଇଛି । ସେ ରାସନ କାର୍ଡ଼ ହେଉ କିମ୍ବା ଫୋନି ପ୍ରଭାବିତଙ୍କୁ ସହାୟତା ରାଶି ପ୍ରଦାନ ହେଉ କିମ୍ବା ଯେ କୌଣସି ସରକାରୀ ଯୋଜନା ହେଉ କେଉଁଠି ନା କେଉଁଠି ବିଏମସି ସେବା ଯୋଗାଇବାରେ ଫେଲ ମାରିଛି । ତାର ନିଚ୍ଛକ ସତ୍ୟତା ଆପଣ ମାନଙ୍କ ପାଖରେ ଆମେ ରଖୁଛୁ।
ଏ ହେଉଛନ୍ତି ଗୁନିତା ରାଉଳ, ଘର ୱାର୍ଡ ନଂ ୨୬ ସାଲିଆ ସାହି । ଦୀର୍ଘ ୩ ବର୍ଷ ହେବ ବିଏମସିକୁ ରାସନ କାର୍ଡ଼ ଖଣ୍ଡେ ପାଇଁ ଦୌଡ଼ି ଦୌଡ଼ି ନୟାନ୍ତ ହେଲେଣି ହେଲେ , କାର୍ଡ଼ ତ ମିଳୁନି ଖାଲି ମିଳୁଛି ମିଥ୍ୟା ପ୍ରତିଶ୍ରୁତି । ସ୍ୱାମୀ ଦିନ ମଜୁରିଆ ଭାବେ କାମ କରନ୍ତି । ସରକାରୀ ସୁବିଧା ମିଳିଲେ ଭୁବନେଶ୍ୱରରେ ଚଳିବା ସୁବିଧା ହୁଅନ୍ତା । ହେଲେ ଗୁନିତାଙ୍କ ଅଭିଯୋଗ ସେ ୩ ବର୍ଷ ହେବ ଦୌଡ଼ି ଦୌଡ଼ି ଧୈର୍ଯ୍ୟହରା ହୋଇଗଲେଣି । ଦିନେ କାମ ନ କଲେ ଉପାସ ରୁହନ୍ତି । ଆଜି ଶେଷ ଥର ପାଇଁ ଆସିଛି ଆଉ କେବେ ଆସିବିନି ବୋଲି ଗୁନିତା କାନ୍ଦି କାନ୍ଦି କହିଛନ୍ତି।