ଭୁବନେଶ୍ୱର: ରାଜଧାନୀରୁ ଅପହୃତ ଠିକାଦାର ବାଲେଶ୍ୱରରୁ ଉଦ୍ଧାର। ଏହି ମାମଲାରେ ସମ୍ପୃକ୍ତ ଥିବା ୩ ଜଣଙ୍କୁ କମିଶନରେଟ ପୋଲିସ ଗିରଫ କରିଛି।
ଖବର ଅନୁସାରେ, ଜୁନ ୨୦ ତାରିଖରେ ବିକ୍ରମ କେଶରୀ ବଳ ଅଫିସ କାମସାରି ଘରକୁ ଫେରୁଥିବା ବେଳେ ପୁରୀ ବାଇପାସ୍ ନିକଟରେ ଏକ ବୋଲେରୋ ଗାଡ଼ି ଅଟକାଇଥିଲା । ଏହି ଗାଡ଼ିରୁ ପ୍ରାୟ ୮-୧୦ ଜଣ ଅଜଣା ଯୁବକ ବିକ୍ରମଙ୍କୁ ଅଟକାଇ ଅପହରଣ କରିନେଇଥିଲେ ।
ଏହି ଘଟଣା ପରେ ବିକ୍ରମଙ୍କ ସାନ ଭାଇ ରାକେଶ କୁମାର ବଳ ୨୧ ତାରିଖରେ ଥାନାରେ ଏକ ଅପହରଣ ମାମଲା ରୁଜୁ କରିଥିଲେ। ଏହାସହ ଅପହରଣରେ ବାଲେଶ୍ଵରର ଜଣେ ଯୁବକ ଏସ.କେ ମିଞ୍ଜା ଉପରେ ସନ୍ଦେହ କରି ପୋଲିସକୁ ଖବର ଦେଇଥିଲେ। ବିକ୍ରମଙ୍କ ଭାଇର ଅଭିଯୋଗ ଆଧାରରେ ପୋଲିସ ତଦନ୍ତ ଆରମ୍ଭ କରିଥିଲା।
ଭିଡିଓ ସୌଜନ୍ୟ: ସମ୍ବାଦଦାତା ଭୁବନେଶ୍ବର
ସୂଚନା ଅନୁଯାୟୀ, ବିକ୍ରମ ଜଣେ ଠିକାଦାର ହୋଇଥିବା ବେଳେ ତାଙ୍କ ପାଖରେ ରହି କାମ କରୁଥିଲା ଏସ.କେ ମିଞ୍ଜା । ବ୍ୟବସାୟିକ ସମସ୍ୟାରେ କ୍ଷତି ହେବାରୁ ବିକ୍ରମଙ୍କୁ ଅପହରଣ କରିବା ପାଇଁ ମିଞ୍ଜା ଯୋଜନା ଆରମ୍ଭ କରିଥିବା ସୂଚନା ମିଳିଛି।