ଭୁବନେଶ୍ବର: ମହିଳା କମିଶନଙ୍କ ନିକଟରେ ସର୍ବାଧିକ ଅଭିଯୋଗ ହୋଇଥିବା ଅଞ୍ଚଳ ମଧ୍ୟରେ ସବୁଠାରୁ ଆଗରେ ରହିଛି ଭୁବନେଶ୍ବର। ଖୋର୍ଦ୍ଧା ଜିଲ୍ଲାର ସର୍ବାଧିକ ମାମଲା ମହିଳା କମିଶନଙ୍କ ନିକଟରେ ପଡିରହିଛି। ଏଥିରୁ ସ୍ପଷ୍ଟ ହେଉଛି ଯେ ରାଜ୍ୟରେ ମହିଳା, ନିଜ ଉପରେ ହେଉଥିବା ଅତ୍ୟାଚାର ବିରୋଧରେ ସଚେତନ ହେବା ସହ ନ୍ୟାୟ ପାଇଁ ଆଗକୁ ଆସୁଛନ୍ତି।
ଚଳିତ ବର୍ଷ ମହିଳା କମିଶନଙ୍କ ପାଖରେ ଖୋର୍ଦ୍ଧା ଜିଲ୍ଲାର ସର୍ବାଧିକ ମାମଲା ରହିଥିବା ବେଳେ ସମ୍ବଲପୁରରେ ସର୍ବନିମ୍ନ ରହିଛି । ଭୁବନେଶ୍ବରରେ 32ଟି ଯୌତୁକ ମାମଲା ରହିଥିବା ବେଳେ 71ଟି ପାରିବାରିକ ହିଂସା ଓ ଗୋଟିଏ ଦୁଷ୍କର୍ମ ମାମଲା ରହିଛି। ମହିଳା କମିଶନଙ୍କ ପାଖରେ ଚଳିତ ବର୍ଷ ଜାନୁଆରୀ ଠାରୁ ଜୁଲାଇ ମାସ ପର୍ଯ୍ୟନ୍ତ ମୋଟ 1325ଟି ମାମଲା ପଞ୍ଜିକୃତ ହୋଇଛି।
ସେଥି ମଧ୍ୟରୁ 648 ଟି ମାମଲାର ଶୁଣାଣି ସରିଛି । ରାଜ୍ୟରେ ସମସ୍ତ ଜିଲ୍ଲା ତୁଳନାରେ ପ୍ରଥମରେ ଖୋର୍ଦ୍ଧା, ଦ୍ଵିତୀୟରେ କଟକ ଏବଂ ତୃତୀୟରେ ପୁରୀ ଜିଲ୍ଲା ରହିଛି।ତେବେ ଖୋର୍ଦ୍ଧା ଜିଲ୍ଲାରେ 80ଟି ଯୌତୁକ ଜନିତ ମାମଲା, 130ଟି ପାରିବାରିକ ହିଂସା ଓ 2ଟି ଦୁଷ୍କର୍ମ ମାମଲା ରୁଜୁ ହୋଇଛି। କଟକ ଜିଲ୍ଲାରେ 39ଟି ଯୌତୁକ ମାମଲା ରହିଥିବା ବେଳେ 46ଟି ପାରିବାରିକ ହିଂସା ଓ 3ଟି ଦୁଷ୍କର୍ମ ମାମଲା ରହିଛି। ସେହିପରି ପୁରୀରେ 33ଟି ଯୌତୁକ ମାମଲା, 44ଟି ପାରିବାରିକ ହିଂସା ଓ ଗୋଟିଏ ଦୁଷ୍କର୍ମ ମାମଲା ରହିଛି।