ଭୁବନେଶ୍ବର: ସୀମା ଟପିଲେ କଲେଜ କର୍ତ୍ତୃପକ୍ଷ । କଲେଜ ବିରୋଧରେ ସ୍ବର ଉତ୍ତୋଳନ କରିବାରୁ ଛାତ୍ରକୁ ପ୍ରଥମେ ବହିଷ୍କାର କଲେ । ଯାହାର ପରିଣାମ ସ୍ବରୁପ ମାନସିକ ନିର୍ଯାତନା ଯୋଗୁଁ ଯୁକ୍ତ 2 ଛାତ୍ର ଜୀବନ ହାରିଥିବା ଅଭିଯୋଗ ହୋଇଛି । ଏଭଳି ଘଟଣା ଘଟିଛି ଚନ୍ଦକା ଥାନା ଅନ୍ତର୍ଗତ ଏକ ଘରୋଇ କଲେଜରେ ।
ଭିଡିଓ ସୌଜନ୍ୟ- ସମ୍ବାଦଦାତା, ଭୁବନେଶ୍ବର
ରୁଦ୍ଧି ନନ୍ଦନ ପ୍ରଧାନ ନାମକ ଛାତ୍ରକୁ ଗତ ମାସ ୧୫ ତାରିଖରେ ବହିଷ୍କାର ପରେ ଛାତ୍ର ଜଣକ ମାନସିକ ଦୁଶ୍ଚିନ୍ତାରେ ଗତ ୧୮ ତାରିଖରେ ବିଷ ପିଇ ଆତ୍ମହତ୍ୟା ଉଦ୍ୟମ କରିଥିଲେ । ପରେ ତାଙ୍କୁ ଏକ ଘରୋଇ ହସପିଟାଲରେ ଭର୍ତ୍ତି କରାଯାଇଥିଲା । କିନ୍ତୁ ଚିକିତ୍ସାଧୀନ ଅବସ୍ଥାରେ ଗତକାଲି ରାତିରେ ତାଙ୍କର ମୃତ୍ୟୁ ହୋଇଥିବା ଅଭିଯୋଗ ହୋଇଛି । ମୃତଦେହ ବ୍ୟବଚ୍ଛେଦ ବେଳେ ତାଙ୍କ ବାପା କୋହଭରା କଣ୍ଠରେ କହିଛନ୍ତି ଯେ, ତାଙ୍କ ପୁଅର ମୃତ୍ୟୁ ପାଇଁ କଲେଜ କର୍ତ୍ତୃପକ୍ଷ ହିଁ ଦାୟୀ ।