ଭୁବନେଶ୍ୱର ବିମାନବନ୍ଦରରୁ 9ଲକ୍ଷ ଟଙ୍କାର ସୁନା ଜବତ, ସାର୍ଟ ବୋତାମରେ ହେଉଥିଲା ଚାଲାଣ

ଭୁବନେଶ୍ୱର ବିମାନବନ୍ଦରରୁ ୨୭୮ ଗ୍ରାମର ସୁନା ଜବତ। ଜବତ ହୋଇଥିବା ସୁନାର ଆନୁମାନିକ ମୂଲ୍ୟ ପ୍ରାୟ ୯ ଲକ୍ଷ ଟଙ୍କା । ବିଶେଷ ସୂତ୍ରରୁ ଖବର ପାଇ ସୁନା ଜବତ କଲା ସୀମାଶୁଳ୍କ ବିଭାଗ। ସାର୍ଟ ବୋତାମରେ ବ୍ୟାଙ୍କକରୁ ସୁନା ଆଣୁଥିଲେ ୨ଜଣ ଚାଲାଣକାରୀ।

ଭୁବନେଶ୍ବର:ବିଜୁ ପଟ୍ଟନାୟକ ବିମାନବନ୍ଦରରୁ ପୁଣି ସୁନା ଜବତ । ବ୍ୟାଙ୍କକ୍‌ରୁ ଦୁଇ ଜଣ ବ୍ୟକ୍ତି ସାର୍ଟ ବୋତାମରେ ସୁନା ଆଣୁଥିବାବେଳେ ସେମାନଙ୍କୁ ଗିରଫ କରିଛି ସୀମାଶୁଳ୍କବିଭାଗ। ସେମାନଙ୍କ ନିକଟରୁ ୨୭୮ ଗ୍ରାମର ସୁନା ଜବତ କରାଯାଇଛି । ଯାହାର ଆନୁମାନିକ ମୂଲ୍ୟ ପ୍ରାୟ ୯ ଲକ୍ଷ ଟଙ୍କା ହେବ ।

ଦୁଇ ଚାଲାଣକାରୀ ପଶ୍ଚିମବଙ୍ଗ ଓ ଝାଡଖଣ୍ଡର ବୋଲି ଜଣାପଡିଛି । ଏମାନେ ଟିକେ ଭିନ୍ନ ଢଙ୍ଗରେ ସାର୍ଟ ବୋତାମରେ ସୁନା ନେଇ ଏଆର୍ ଏସିଆ - ଏଫ୍ ଡି -୧୧୨ ବିମାନରେ ଫେରୁଥିଲେ । ତେବେ ଭୁବନେଶ୍ୱର ବିମାନବନ୍ଦରରେ ସେମାନଙ୍କ ଉପରେ ସନ୍ଦେହ ହେବାରୁ ବ୍ୟକ୍ତିଗତ ଭାବରେ ଦୁଇ ଜଣଙ୍କୁ ସୁରକ୍ଷାକର୍ମୀ ଯାଞ୍ଚ କରିଥିଲେ। ଯାଞ୍ଚରୁ ଏମାନେ ସୁନା ଚାଲାଣ କରୁଥିବା ଜଣାପଡିଥିଲା ।

ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ