ବ୍ରହ୍ମପୁର: ପଙ୍କରେ ଫୁଟେ ପଦ୍ମ । ଅସମ୍ଭବ ବି ଚେଷ୍ଟା ବଳରେ ହୋଇପାରେ ସମ୍ଭବ । ବିନା ପ୍ରହସନରେ ମଧ୍ୟ ଲକ୍ଷ୍ୟ ସ୍ଥଳରେ ପହଞ୍ଚିପାରେ ମଣିଷ। ଯାହାକୁ ପ୍ରମାଣ କରି ଦେଖାଇପାରିଛନ୍ତି ବ୍ରହ୍ମପୁର ସହରର ଲକ୍ଷ୍ମୀନୃସିଂହ ସାହିର ଚତୁର୍ଥ ଲାଇନରେ ରହୁଥିବା ଚନ୍ଦନ କୁମାର ସାହୁ। ଯାହାଙ୍କ ବୟସ ମାତ୍ର 24 ବର୍ଷ । କିନ୍ତୁ ଦକ୍ଷତା ସମସ୍ତଙ୍କୁ ଆଶ୍ଚର୍ଯ୍ୟ କଲାଭଳି । ଏକ ଗରିବ ପରିବାରରୁ ଯାଇ ଜାତୀୟ ସ୍ତରରେ ବେଶ ସୁନାମ ଅର୍ଜନ କରିପାରିଥିବା ଚନ୍ଦନ ଏବେ ବିଶ୍ୱସ୍ତରର ସୁନ୍ଦର ସ୍ୱାସ୍ଥ୍ୟ ପ୍ରତିଯୋଗିତାରେ ସଫଳତା ଅର୍ଜନ କରିଛନ୍ତି। ଉଜବେକିସ୍ତାନର ତାସକେଣ୍ଟରେ ଚାଲିଥିବା ୧୨ତମ ବିଶ୍ବ ସୁନ୍ଦର ସ୍ବାସ୍ଥ୍ୟ ପ୍ରତିଯୋଗିତାରେ ଭାରତ ପାଇଁ ପ୍ରତିନିଧିତ୍ବ କରି ହାସଲ କରିଥିଲେ ସ୍ବର୍ଣ୍ଣ ପଦକ ।
ନିଜର ସୁନ୍ଦର ସ୍ୱାସ୍ଥ୍ୟକୁ ଫିଟ୍ ରଖିବା ପାଇଁ ଦୈନିକ ୭ରୁ ୮ ଘଣ୍ଟା ସମୟ ବ୍ୟାୟାମ କରିବା ଠାରୁ ଆରମ୍ଭ କରି ଅନ୍ୟାନ୍ୟ ବିଷୟ ଉପରେ ଗୁରୁତ୍ୱ ଦେଇଥାନ୍ତି ଚନ୍ଦନ । ମୁଖ୍ୟତଃ ନିଜର ସୁନ୍ଦର ସ୍ୱାସ୍ଥ୍ୟକୁ ଫିଟ ରଖିବା ପାଇଁ ଖାଦ୍ୟପେୟକୁ ଧ୍ୟାନ ଦେବାକୁ ପଡିଥାଏ । ତେବେ ସେଥିନିମନ୍ତେ ବେଶ ଅର୍ଥ ଖର୍ଚ୍ଚ କରିବାକୁ ପଡିଥାଏ । ତେବେ ଗୋଟିଏ ପଟେ ପରିବାରରେ ଆର୍ଥିକ ସ୍ଥିତି ସେତେଟା ସ୍ୱଚ୍ଛଳ ନଥିବା ଯୋଗୁଁ ଚନ୍ଦନ ନିଜେ ଅଭ୍ୟାସ କରିବା ସହିତ ସହରର ଏକ ପ୍ରମୁଖ ଜିମରେ ଟ୍ରେନର ଭାବେ କାର୍ଯ୍ୟ କରୁଛନ୍ତି । କିନ୍ତୁ ଦୁଃଖର ବିଷୟ, ନିଜକୁ ପ୍ରସ୍ତୁତ କରିବା ଲାଗି ପରିବାରର ଅଭାବୀ ପରିସ୍ଥିତି ସବୁବେଳେ ସାଜିଛି ବାଧକ । ସେପଟେ ସରକାରୀ ବା ବେସରକାରୀ ସ୍ତରରେ ବି ତାଙ୍କୁ ମିଳିନି କୌଣସି ସହାୟତା ।