ଗଞ୍ଜାମରେ ପୁଣି ଜବତ ହେଲା ଗଞ୍ଜେଇ ବୋଝେଇ ଟ୍ରକ

ରାଜ୍ୟରେ ଗଞ୍ଜେଇ ବେପାରୀଙ୍କୁ ନିସ୍ତାର ନାହିଁ । ଶନିବାର ମଧ୍ୟ ଏକ ଗଞ୍ଜେଇ ବୋଝେଇ ଟ୍ରକକୁ ଜବତ କରିଛି ପୋଲିସ ।

ବ୍ରହ୍ମପୁର: ବେଆଇନ ଭାବରେ ଚୋରା ଚାଲାଣ ହେଉଥିବା ଗଞ୍ଜେଇ ଜବତ କରିବାରେ ସଫଳ ହୋଇଛି ଗଞ୍ଜାମ ଜିଲ୍ଲାର ଖଲ୍ଲିକୋଟ ପୋଲିସ । କୌଣସି ଏକ ବିଶେଷ ସୁତ୍ରରୁ ଖବର ପାଇ ୧୬ ନମ୍ବର ଜାତୀୟ ରାଜପଥର ଲଙ୍ଗଳେଶ୍ବର କଳାଝର ନଈ ନିକଟରେ ଏକ କଣ୍ଟେନର ଟ୍ରକ ନମ୍ବର ଏଚଆର 38X 5357ରେ ଗଞ୍ଜେଇ ବୋଝେଇ ହୋଇ ଯାଉଥିଲା ।

ଯାହାକୁ ଜବତ କରିବା ସହ ଜଣଙ୍କୁ ଗିରଫ କରାଯାଇଛି । କଣ୍ଟେନର ଟ୍ରକ ଡ୍ରାଇଭର ଅଜୟ କୁମାର ସିଂ କୁ ପୋଲିସ ଗିରଫ କରିଥିବା ବେଳେ ଅନ୍ୟ ଜଣେ ସହଯୋଗୀ ଘଟଣା ସ୍ଥଳରୁ ଦୌଡ଼ି ପଳାଇବାରେ ସଫଳ ହୋଇଛି ।

ଜବତ ହୋଇଥିବା ଗଞ୍ଜେଇ ପ୍ରାୟ ଦୁଇ କୁଇଣ୍ଟାଲ୍ ୯୩ କେଜି ହୋଇଥିବା ବେଳେ ଏହାର ଆନୁମାନିକ ମୂଲ୍ୟ ପ୍ରାୟ ୧୪ ଲକ୍ଷ ଟଙ୍କା ହେବ ବୋଲି କୁହାଯାଇଛି । ଏହି ଗଞ୍ଜେଇ ଖୋର୍ଦ୍ଧା ଅଞ୍ଚଳକୁ ଚାଲାଣ ହେଉଥିବା ଜଣାପଡିଛି ।

ମୁଖ୍ୟତଃ ଏହି ଚଢ଼ାଉ ସମୟରେ ଖଲ୍ଲିକୋଟ ଥାନା ଅଧିକାରୀ ସତ୍ୟ ରଞ୍ଜନ ପ୍ରଧାନ, ଖଲ୍ଲିକୋଟ ତହସିଲଦାର ଚିତ୍ତ ରଞ୍ଜନ ମହାନ୍ତି, ଭେଜିପୁଟ ଫାଣ୍ତି ଅଧିକାରୀ ସୁଶାନ୍ତ କୁମାର ପ୍ରଧାନ ଓ ସାକ୍ଷୀ ମାନଙ୍କ ଉପସ୍ଥିତିରେ ଗଞ୍ଜେଇ ବସ୍ତା ଗୁଡ଼ାକ ସିଲ୍ କରାଯାଇ କୋର୍ଟ ଚାଲାଣ କରାଯାଇଛି ।

ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ