ବାରିପଦା: ବାରିପଦା ପୌରପାଳିକା ଅଞ୍ଚଳରେ ମାତ୍ରାଧିକ ହୋଲଡିଂ ଟିକସ ବୃଦ୍ଧିକୁ ଦୃଢ ବିରୋଧକରି ଭଞ୍ଜସେନା ପକ୍ଷରୁ ଏକ ପ୍ରତିନିଧି ଦଳ ନଗରପାଳଙ୍କୁ ଭେଟି ଆଲୋଚନା କରିଛନ୍ତି। ବାରିପଦା ପୌରପରିଷଦ ଟିକସଦାତାଙ୍କ ପକ୍ଷରୁ ଟିକସ ବୃଦ୍ଧିର ପ୍ରତ୍ୟାହାର ଦାବିରେ ଏକ ପ୍ରତିନିଧି ଦଳ ସଭାପତି ପିଣ୍ଟୁ ମାଇତିଙ୍କ ନେତୃତ୍ବରେ ଭେଟିଥିଲେ। କରୋନା ମହାମାରୀରେ ଅର୍ଥନୀତି ରସାତଳଗାମୀ ହୋଇଛି। ଶ୍ରମିକ, କୃଷକ, ବ୍ୟବସାୟୀ, ସାଧାରଣ ପରିବାରଙ୍କ ଆର୍ଥିକ ମେରୁଦଣ୍ଡ ଉପରେ ଶକ୍ତ ଆଘାତ ଲାଗିଛି।
ହୋଲଡିଂ ଟ୍ୟାକ୍ସ ହ୍ରାସ ଦାବିରେ ନଗରପାଳଙ୍କୁ ଭେଟିଲା ଭଞ୍ଜସେନା
ସରକାରଙ୍କର ଅନିୟନ୍ତ୍ରିତ ବଜାରର ମୂଲ୍ୟବୃଦ୍ଧି ଯୋଗୁଁ ନିତ୍ୟ ବ୍ୟବହାର୍ଯ୍ୟ ସାମଗ୍ରୀ, ପେଟ୍ରୋଲ-ଡିଜେଲ-ରନ୍ଧନ ଗ୍ୟାସ , କପଡା, ଜୀବନରକ୍ଷାକାରୀ ଔଷଧ, ପନିପରିବା ଇତ୍ୟାଦିର ଅହେତୁକ ଦରବୃଦ୍ଧି ଫଳରେ ଜନତା ତ୍ରାହି ତ୍ରାହି ଡାକୁଛନ୍ତି। ବେରୋଜଗାର ବହୁଗୁଣିତ ହୋଇଛି, ନୂତନ କର୍ମ ସଂସ୍ଥାନ ବନ୍ଦ, ମଣିଷ ଦ୍ଵାରା ମଣିଷର ଶୋଷଣ ବଢି ଚାଲିଛି।