ବାରିପଦା: ମୟୂରଭଞ୍ଜ ଜିଲ୍ଲାର ବହୁ ଚର୍ଚ୍ଚିତ ବଡସାହି ତହସିଲ ଅନ୍ତର୍ଗତ ବୁଢାବଳଙ୍ଗ ନଦୀରୁ ବାଲି ଚୋରା ଚାଲାଣ ଘଟଣା ରେ ନିଲମ୍ବିତ ହୋଇଛନ୍ତି ତହସିଲଦାର । ବୁଢାବଳଙ୍ଗ ନଦୀର ଆରପଟା ଓ ଡିଙ୍ଗିରା ବାଲିଘାଟରୁ ବେଆଇନ ବାଲି ଚାଲାଣ ମାମଲାରେ ଲିଜଧାରୀ ପ୍ରଦୀପ ବିନ୍ଧାଣୀଙ୍କୁ ଗିରଫ କରାଯାଇଥିବା ବେଳେ ଅନ୍ୟତମ ଅଭିଯୁକ୍ତ ବଡସାହି ତହସିଲଦାର ମମତାଜ ମହାରଣାଙ୍କର ପତ୍ତା ମିଳୁନି । ଜାତୀୟ ସବୁଜ ପ୍ରାଧିକରଣଙ୍କ (NGT) ନିର୍ଦ୍ଦେଶକ୍ରମେ ଏହି ଘଟଣାରେ କେସ୍ ନଂ ୧୧୪/୨୨ ଓ ୧୧୫/୨୨ରେ ଦୁଇଟି ମାମଲା ରୁଜୁ ହୋଇଛି ।
ଜିଲ୍ଲାପାଳଙ୍କ ବିନା ଅନୁମତିରେ ଜିଲ୍ଲା ମୁଖ୍ୟାଳୟ ଛାଡି ପାରିବେ ନାହିଁ ବୋଲି ନିର୍ଦ୍ଦେଶ ଥିଲେ ମଧ୍ୟ ତହସିଲଦାର ମମତାଜ ମହାରଣା ଏପ୍ରିଲ ୩୦ ତାରିଖଠାରୁ ଫେରାର ହୋଇ ଯାଇଛନ୍ତି । ବିନା ଅନୁମତିରେ କାର୍ଯ୍ୟାଳୟରେ ଅନୁପସ୍ଥିତ ରହିବାରୁ ତାଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ପାଇଁ ଜିଲ୍ଲାପାଳ ବିନୀତ ଭରଦ୍ବାଜ ସୁପାରିଶ କରିଥିଲେ । ଏନେଇ ରାଜ୍ୟ ସରକାରଙ୍କ ଅତିରିକ୍ତ ମୁଖ୍ୟ ଶାସନ ସଚିବ ଚିଠି ନଂ ଆରଡିଏମ ଡିପିପିଏମ-୦୦୦୫-୨୦୨୨/୧୪୫୦୨/୬.୫.୨୦୨୨ରେ ତହସିଲଦାରଙ୍କୁ ନିଲମ୍ବନ କରାଯାଇଥିବା ସଂକ୍ରାନ୍ତରେ ଚିଠି ଜାରି କରିଛନ୍ତି ।