ବାଲେଶ୍ବର:ଲଘୁଚାପ ଜନିତ ଲଗାଣ ବର୍ଷା ପରେ ଜିଲ୍ଲାର ବସ୍ତା ବ୍ଲକ୍ ମଥାନି ଠାରେ ବିପଦ ସଙ୍କେତ ଉପରେ ଜଳ ପ୍ରବାହିତ ହେଉଛି । ତେବେ ଏହି ଜଳସ୍ତର ୫.୫୦ ମିଟର ଥିବା ବେଳେ ଜଳକା ନଦୀରେ ୭.୩୦ ମିଟର ଉପରେ ରହିଛି ଜଳସ୍ତର । ଏଥିପାଇଁ ବିଭିନ୍ନ ଗାଁ ଏବେ ଜଳମଗ୍ନ ହୋଇଥିବା ଦେଖିବାକୁ ମିଳିଛି । ଲଘୁଚାପ ଜନିତ ଲଗାଣ ବର୍ଷା ଏବଂ ଜଳକା ନଦୀର ଉପର ମୁଣ୍ଡରେ ପ୍ରବଳ ବର୍ଷା ଯୋଗୁଁ ଜଳସ୍ତର କ୍ରମଶଃ ବୃଦ୍ଧି ପାଇବାରେ ଲାଗିଛି ।
ବାଲେଶ୍ବରରେ ବନ୍ୟା ବିପଦ !, ଜଳକାରେ ୨୦୦ ମିଟର ଘାଇ
ସେପଟେ ବସ୍ତା ବ୍ଲକ ସୀମାକୁ ଲାଗି କରିଥିବା ଅଞ୍ଚଳରେ ଦୁର୍ବଳ ନଦୀବନ୍ଧ ଭାଙ୍ଗିଯିବା ଯୋଗୁଁ ୨୦୦ ମିଟରର ଏକ ଘାଇ ସୃଷ୍ଟି ହୋଇଛି । ଏହାଦ୍ବାରା ବ୍ଲକର ୧୨ରୁ ଉର୍ଦ୍ଧ୍ବ ପଞ୍ଚାୟତ ପାଣି ଘେରରେ ରହିବା ସହ ଅଞ୍ଚଳର ପ୍ରାୟ ୧୦ଟି ଗାଁରେ ବ୍ୟାପକ କ୍ଷୟକ୍ଷତି ହେବା ସହ ହଜାର ହଜାର ହେକ୍ଟର ଚାଷ ଜମି ଜଳମଗ୍ନ ହୋଇଥିବା ଦେଖିବାକୁ ମିଳିଛି । ତା ସହିତ ରାଘବପୁର ଓ ରାସଗୋବିନ୍ଦପୁର ପଞ୍ଚାୟତର ଏକତାଳୀ ଠାରେ ବନ୍ୟା ପରିସ୍ଥିତି ସୃଷ୍ଟି ହୋଇଛି ।