ବାଲେଶ୍ବର: ଛାତ୍ରଛାତ୍ରୀ ପରୀକ୍ଷା ଦେଇ ପାସ କରିଥିଲେ ସୁଦ୍ଧା ସାର୍ଟିଫିକେଟ ଦେଉନି ଘରୋଇ ଇଞ୍ଜିନିୟରିଂ କଲେଜ । ଏପରି ଅଭିଯୋଗ ଆସିଛି ବାଲେଶ୍ବରର ସତ୍ୟସାଇ ଇଞ୍ଜିନିୟରିଂ କଲେଜ କର୍ତ୍ତୃପକ୍ଷଙ୍କ ବିରୋଧରେ । କଲେଜ କର୍ତ୍ତୃପକ୍ଷଙ୍କ ଏପରି ମନମୁଖୀ କାର୍ଯ୍ୟ ପାଇଁ ଛାତ୍ରଛାତ୍ରୀ ନାନା ସମସ୍ୟାର ସମ୍ମୁଖୀନ ହେବାକୁ ବାଧ୍ୟ ହେଉଛନ୍ତି । ଫଳରେ ଛାତ୍ରଛାତ୍ରୀ ଅସନ୍ତୋଷ ପ୍ରକାଶ କରି ଜିଲ୍ଲାପାଳଙ୍କ ଦ୍ବାରସ୍ଥ ହେବା ସହ ଟାଉନ ଥାନାରେ ଏତଲା ମଧ୍ୟ ଦେଇଛନ୍ତି ।
ପରୀକ୍ଷା ପରେ ବି ସାର୍ଟିଫିକେଟ ଦେଉନାହିଁ କଲେଜ, ଜିଲ୍ଲାପାଳଙ୍କ ଦ୍ବାରସ୍ଥ ହେଲେ ଛାତ୍ରଛାତ୍ରୀ
ଘଟଣା ଅନୁସାରେ, 2019 ମସିହାରେ ଛାତ୍ରଛାତ୍ରୀ B-TECH ପାସ କରି ସାରିଥିବାବେଳେ କଲେଜ କର୍ତ୍ତୃପକ୍ଷ ଆଜିକାଲି କହି ସେମାନଙ୍କୁ ଏପର୍ଯ୍ୟନ୍ତ ସାର୍ଟିଫିକେଟ ପ୍ରଦାନ କରିନାହିଁ । ପାସ ପିଲାମାନେ କିଛି ଘରୋଇ କମ୍ପାନୀରେ ଚାକିରୀ କରିଥିବାବେଳେ କମ୍ପାନୀ କର୍ତ୍ତୃପକ୍ଷଙ୍କୁ ସାର୍ଟିଫିକେଟ ଦେଖାଇ ପାରୁନାହାନ୍ତି । ଅନ୍ୟପଟେ କଲେଜର ଏପରି ଅବହେଳା ପାଇଁ ଛାତ୍ରଛାତ୍ରୀ ଅନ୍ୟତ୍ର ଚାକିରୀ ପାଇଁ ମଧ୍ୟ ଆବେଦନ କରିବାରୁ ବଞ୍ଚିତ ହୋଇଆସୁଥିବା ଅଭିଯୋଗ କରିଛନ୍ତି ।