ହାଇଦ୍ରାବାଦ:ଦେଶରେ ଦିନକୁ ଦିନ ଡିଜିଟାଲ ପେମେଣ୍ଟ ଉପଯୋଗ ବଢି ଚାଲିଛି । ଲୋକମାନେ ବ୍ୟାଙ୍କ ନ ଯାଇ ଚୁଟ୍କିରେ ଟଙ୍କା ନେଣଦେଣ କରୁଛନ୍ତି । ସମ୍ପ୍ରତି ଡିଟିଜାଲ ପେମେଣ୍ଟ ବଢୁଥିଲେ ମଧ୍ୟ ଅଧିକ ଅର୍ଥରାଶି କାରବାର ପାଇଁ ଚେକ୍ ଭୂମିକା ମହତ୍ତ୍ବପୂର୍ଣ୍ଣ ରହିଛି । ଅବଶ୍ୟ ଚେକ୍ ପେମେଣ୍ଟ ରାଶି ସଂଶୋଧନରେ ଜଟିଳତା ଏବଂ ଜାଲି ଦସ୍ତଖତ ଭଳି କିଛି ସମସ୍ୟା ଏଥିରେ ରହିଛି । ଯାହାକି ବ୍ୟାଙ୍କିଙ୍ଗ ବ୍ୟବସ୍ଥାରେ ଅତି ଗୁରୁତ୍ବପୂର୍ଣ୍ଣ ଅଟେ । ଆଜିକାଲି ଅନେକ ସମୟରେ ଚେକ୍ ପେମେଣ୍ଟରେ ଠକେଇ ଘଟଣା ସାମ୍ନାକୁ ଆସୁଛି ।
ତେଣୁ ଏହିସବୁ ସମସ୍ୟାର ସମାଧାନ ସହ ପେମେଣ୍ଟ ସମୟରେ ଆପଣଙ୍କ ଅର୍ଥର ସୁରକ୍ଷା ପାଇଁ ପଜିଟିଭ ପେ ସିଷ୍ଟମ(PPS) ବ୍ୟବସ୍ଥା ଆଣିଛି ଭାରତୀୟ ରିଜର୍ଭ ବ୍ୟାଙ୍କ । ପଜିଟିଭ ପେ ସିଷ୍ଟମ ଆପଣଙ୍କ ଚେକ୍କୁ ସୁରକ୍ଷା ପ୍ରଦାନ କରିବ । ଏହି ସିଷ୍ଟମ ମାଧ୍ୟମରେ ୫ ଲକ୍ଷରୁ ଅଧିକ ଟଙ୍କାର ଚେକ୍ କାରବାର ପାଇଁ ଗ୍ରାହକଙ୍କ ଠାରୁ ଏ ସମ୍ପର୍କରେ ସୁନିଶ୍ଚିତ କରାଯିବ । ଏହାଦ୍ବାରା ଚେକ୍ ଜାରି ସମୟରେ ଏହାର ରାଶି ଏବଂ ଚେକ୍ ନେଉଥିବା ବ୍ୟକ୍ତିଙ୍କ ବିବରଣୀ ବ୍ୟାଙ୍କକୁ ସୂଚୀତ କରାନଯିବା ଯାଏଁ ଏହାକୁ ଗ୍ରହଣ କରାଯିବ ନାହିଁ ।
ବ୍ୟାଙ୍କିଙ୍ଗ ଠକେଇରେ ଅଙ୍କୁଶ ଲଗାଇବାକୁ ପଜିଟିଭ ପେ ସିଷ୍ଟମ(PPS) ବ୍ୟବସ୍ଥା ଆରମ୍ଭ ହୋଇଛି । ୫ ଲକ୍ଷରୁ ଅଧିକ ମୂଲ୍ୟର ଚେକ୍ କାରବାର ପାଇଁ PPS ଅନୁସରଣ କରିବା ବାଧ୍ୟତାମୂଳକ କରିଛି ରିଜର୍ଭ ବ୍ୟାଙ୍କ । National Payments Corporation of India ଏହି ବ୍ୟବସ୍ଥା ବିକଶିତ କରିଛି । PPS ସିଷ୍ଟମରେ ୫ ଲକ୍ଷରୁ ଅଧିକ ଦେୟ ପ୍ରଦାନ କରୁଥିବା ଚେକଗୁଡ଼ିକୁ ରି-କନଫର୍ମ କରିବାକୁ ପଡିବ । ଚେକ ଜାରି କରିଥିବା ବ୍ୟକ୍ତିଙ୍କୁ ଚେକର ତାରିଖ, ଲାଭାର୍ଥିଙ୍କ ନାମ, ପ୍ରାପ୍ତ ବ୍ୟକ୍ତି ଏବଂ କେତେ ଟଙ୍କା ଦେବେ ସେ ବିଷୟରେ ଦ୍ବିତୀୟ ଥର ସୂଚନା ଦେବାକୁ ପଡିବ । ଏସଏମଏସ, ମୋବାଇଲ୍ ଆପ୍, ଇଣ୍ଟରନେଟ୍ ବ୍ୟାଙ୍କିଙ୍ଗ୍ ଏବଂ ଏଟିଏମ୍ ମାଧ୍ୟମରେ ଚେକର ସୂଚନା ଦିଆଯାଇପାରେ । ଚେକ୍ ଦେୟ ପୂର୍ବରୁ ଏହି ବିବରଣୀଗୁଡିକୁ ପୁନଶ୍ଚ ଯାଞ୍ଚ କରାଯିବ ।