ନୂଆଦିଲ୍ଲୀ: ଊର୍ଦ୍ଧ୍ବମୁହାଁ ଗାଡି ଇନ୍ଧନ ଦାମ । ଦିନକୁ ଦିନ ମହଙ୍ଗା ହେବାରେ ଲାଗିଛି ପେଟ୍ରୋଲ ଓ ଡିଜେଲ । ଶନିବାର ପୁଣି ଗାଡି ଇନ୍ଧନ ଦାମ ବଢିବା ପରେ ତାମିଲନାଡୁରେ ପେଟ୍ରୋଲ ଦାମ ଲିଟର ପ୍ରତି 100 ଟଙ୍କା ଟପିଛି ।
ସାର୍ବଜନିକ କ୍ଷେତ୍ରର ପେଟ୍ରୋଲିୟମ କମ୍ପାନୀର ଦାମ ବିଜ୍ଞପ୍ତି ଅନୁସାରେ , ପେଟ୍ରୋଲ ଓ ଡିଜେଲ ଦାମ ଲିଟର ପ୍ରତି 35 ପଇସା ଲେଖାଁ ବଢିଛି । ଯାହାକି ନିକଟ ସମୟରେ ଗାଡି ଇନ୍ଧନ ଦାମରେ ସବୁଠୁ ଅଧିକ ବୃଦ୍ଧି ।
ଲଗାତାର ବୃଦ୍ଧି ଦ୍ବାରା ଦେଶରେ ପେଟ୍ରୋଲ ଓ ଡିଜେଲ ଦାମ ଐତିହାସିକ ସର୍ବୋଚ୍ଚ ସ୍ତରରେ ପହଞ୍ଚିଛି । ସେପଟେ ଶତକ ଉପରେ ପେଟ୍ରୋଲ ଲିଷ୍ଟରେ ଆଉ ଏକ ରାଜ୍ୟ ତାମିଲନାଡୁ ସାମିଲ ହୋଇଛି ।
ରାଜଧାନୀ ଦିଲ୍ଲୀରେ ପେଟ୍ରୋଲ ସର୍ବକାଳୀନ ସ୍ତର ଲିଟର ପ୍ରତି 35 ପଇସା ବଢି 98.11 ଟଙ୍କାରେ ପହଞ୍ଚିଛି । ସେହିଭଳି ଡିଜେଲ ଦାମ ଲିଟର ପିଛା 88.65 ଟଙ୍କା ଅଛି । ଭାଟ ଓ ପରିବହନ ଭଡା ଯୋଗୁଁ ବିଭିନ୍ନ ରାଜ୍ୟରେ ଇନ୍ଧନ ଦାମ ଭିନ୍ନ ଭିନ୍ନ ରହିଥାଏ ।
ରାଜସ୍ତାନ , ମଧ୍ୟପ୍ରଦେଶ , ମହାରାଷ୍ଟ୍ର, ଆନ୍ଧ୍ର ପ୍ରଦେଶ, ତେଲେଙ୍ଗାନା, କର୍ଣ୍ଣାଟକ, ଜାମ୍ମୁକାଶ୍ମୀର , ଓଡିଶା ଓ ଲଦାଖ ଭଳି ଅନେକ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ପରେ ତାମିଲନାଡୁର ବିଭିନ୍ନ ସହରରେ ପେଟ୍ରୋଲ ଦାମ 100 ଡେଇଁଛି ।
ମେ 4ରୁ ଏବେ ସୁଦ୍ଧା ଗାଡି ଇନ୍ଧନ ଦାମରେ 30 ଥର ବୃଦ୍ଧି ହୋଇଛି । 30 ଥରରେ ପେଟ୍ରୋଲ ଦାମ ଲିଟର ପ୍ରତି 7.71 ଟଙ୍କା ଓ ଡିଜେଲ 8.12 ଟଙ୍କା ମହଙ୍ଗା ହୋଇଛି ।
