ନୂଆଦିଲ୍ଲୀ: ‘ଅର୍ଥ ବ୍ୟବସ୍ଥାକୁ ମାନ୍ଦାବସ୍ଥାରୁ ମୁକୁଳିବା ପାଇଁ ଅପପ୍ରଚାର ନୁହେଁ , ବରଂ ଏକ ସଠିକ ନୀତିର ଆବଶ୍ୟକ ରହିଛି ।’ ଗୁରୁବାର ଏଭଳି ଟ୍ବିଟ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଟାର୍ଗେଟ କରିଛନ୍ତି କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ ।
ଏକ ଇଂରାଜୀ ଗଣମାଧ୍ୟମରେ ଛପାଯାଇଥିବା ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହଙ୍କ ଏକ ସାକ୍ଷାତକାର ପ୍ରତି ଉତ୍ତରରେ ରାହୁଲ ସରକାରଙ୍କୁ ଏପରି କଟାକ୍ଷ କରିଛନ୍ତି ।
ସେ କହିଛନ୍ତି ଯେ, ‘ଦେଶର ଅର୍ଥ ବ୍ୟବସ୍ଥା ନେଇ ଯେଉଁ ସବୁ ସମସ୍ୟା ରହିଛି , ତାକୁ ସରକାର ସ୍ବୀକାର କରିବା ହିଁ ପ୍ରଥମ ଆରମ୍ଭ । ବର୍ତ୍ତମାନ ସମୟରେ ଅପପ୍ରଚାର, ମନଗଢା ଖବର ଓ ଯୁବକଙ୍କୁ ନେଇ ମୂର୍ଖତାପୂର୍ଣ୍ଣ ବାର୍ତ୍ତାର କୌଣସି ଆବଶ୍ୟକତା ନାହିଁ । ବରଂ ଉପଯୁକ୍ତ ନୀତି ଜରିଆରେ ଅର୍ଥ ବ୍ୟବସ୍ଥାର ସ୍ଥିତିକୁ ଠିକ କରାଯାଇପାରିବ ।’
ତେବେ ମନମୋହନ ସିଂହ ଦେଇଥିବା ସାକ୍ଷାତକାରରେ କହିଛନ୍ତି କି , ବିମୁଦ୍ରାକରଣ ଓ ଭୁଲ ଢଙ୍ଗରେ ଜିଏସଟି ଲାଗୁ ଯୋଗୁଁ ଅର୍ଥନୀତି ଆଜି ଧିମେଇ ପଡିଛି ।