ନୂଆଦିଲ୍ଲୀ: 2020-21 ଆର୍ଥିକ ବର୍ଷର ବଜେଟ ଉପସ୍ଥାପନ ପରେ ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ପ୍ରତିକ୍ରିୟା । ଏହି ବଜେଟକୁ ସେ ସକରାତ୍ମକ ଦର୍ଶାଇଛନ୍ତି ।
କର୍ପୋରେଟରେ ବଜେଟର ଏତେଟା ଉତ୍ସାହଜନକ ପ୍ରଭାବ ହୋଇନାହିଁ ପଚାରିବାରୁ ଅର୍ଥମନ୍ତ୍ରୀ କହିଛନ୍ତି , ‘‘କର୍ପୋରେଟ ସେକ୍ଟର ଉପରେ ବଜେଟ ଘୋଷଣାର ବାସ୍ତବିକ ପ୍ରଭାବ ଦେଖିବାକୁ ହେଲେ ଆମକୁ ସୋମବାର ପର୍ଯ୍ୟନ୍ତ ଅପେକ୍ଷା କରିବାକୁ ପଡିବ ।’’
ଶନିବାର ଅଣ କାର୍ଯ୍ୟଦିବସ ହେବା ପରେ ବି ସେୟାର ବଜାର ଖୋଲାଯାଇଥିଲା । ହେଲେ ବଜେଟ ଭାଷଣର କେଇ କ୍ଷଣ ପରଠୁ ଖସିଥିଲା ସେୟାର ସୂଚକାଙ୍କ । ବଜାର ବନ୍ଦ ସୁଦ୍ଧା ସେନସେକ୍ସ 40 ହଜାର ତଳକୁ ହ୍ରାସ ପାଇଥିଲା ବେଳେ ନିଫ୍ଟି 300 ପଏଣ୍ଟ କମିଛି । ଆୟକର ଟିକସ ସ୍ଲାବ ଖସିବା ପରେ ବି ବଜାରରେ ଏଭଳି ହ୍ରାସ ଦେଖାଦେଇଛି ।
ପ୍ରସ୍ତାବିତ କର ବ୍ୟବସ୍ଥା ଯୋଗୁଁ ଉପଭୋକ୍ତାଙ୍କ ହାତରେ ଅଧିକ ଟଙ୍କା ଆସିବା ଆଶା ରହିଛି । ଯେଉଁଥିରେ ଉପଭୋଗ ଚାହିଦାକୁ ପ୍ରୋତ୍ସାହନ ମିଳିପାରିବ । ପ୍ରକାଶ ଯେ, ଜିଡିପି ଖସିବାର ମୁଖ୍ୟ କାରଣ ଉପଭୋକ୍ତା ଚାହିଦା ହ୍ରାସ ବୋଲି କୁହାଯାଇଛି ।
ଅନ୍ୟ ସକରାତ୍ମକ ତଥ୍ୟ ମଧ୍ୟରେ ଅର୍ଥମନ୍ତ୍ରୀ ଆସନ୍ତା ବର୍ଷ ପାଇଁ ଜିଡିପି ଅନୁମାନ 10 ପ୍ରତିଶତ ରଖିଛନ୍ତି । ସେପଟେ ରାଜକୋଷୀୟ ଘାଟା ଲକ୍ଷ୍ୟକୁ ବୃଦ୍ଧି କରି ମୋଟ ଘରୋଇ ଉତ୍ପାଦର 3.8 ପ୍ରତିଶତ କରାଯାଇଛି । ପୂର୍ବରୁ ଏହା 3.3. ପ୍ରତିଶତ ରହିଥିଲା । ଆର୍ଥିକ ବର୍ଷ 2020-21 ପାଇଁ ବଜେଟ ଅନୁମାନ 3.5 ପ୍ରତିଶତ ରଖାଯାଇଥିଲା ।
ସେହିପରି ସରକାର କର୍ପୋରେଟ ବଣ୍ଡ ଉପରେ ଏଫପିଆଇରେ ନିବେଶ ସୀମାକୁ ବଢାଇ 15 ପ୍ରତିଶତ କରିଛନ୍ତି । ବର୍ତ୍ତମାନ ଏହା 9 ପ୍ରତିଶତ ରହିଛି । ଏହି ପଦକ୍ଷେପ ନିଶ୍ଚିତ ବଣ୍ଡ ମାର୍କେଟକୁ ମଜବୁତ କରିବ ବୋଲି ସୀତାରମଣ କହିଛନ୍ତି ।
