ନୂଆଦିଲ୍ଲୀ: ଆଉ ଅଣ୍ଟା ସଳଖି ପାରିବନି ଦେଶର ସର୍ବପୁରାତନ ଏୟାରଲାଇନ୍ସ ଜେଟ ଏୟାର ୱେଜ । ବହୁ ପ୍ରଚେଷ୍ଟା ପରେ ମଧ୍ୟ ସୁଧୁରୁପାରିଲାନି ସ୍ଥିତି । ଘୋର ଅର୍ଥ ସଙ୍କଟ ଦେଇ ଗତି କରୁଥିବାରୁ ଏଥିରେ ଟଙ୍କା ଲଗାଇବାକୁ ନିବେଶକ ବି ନାରାଜ । ଶେଷରେ ଭାରତୀୟ ଷ୍ଟେଟ ବ୍ୟାଙ୍କ ଏହାର ପୁନରୁଦ୍ଧାର କରି ନପାରି ମାମଲାକୁ ଜାତୀୟ କମ୍ପାନୀ ଆଇନ ଟ୍ରିବ୍ୟୁନାଲ(ଏନସିଏଲଟି)କୁ ନେବାକୁ ନିଷ୍ପତ୍ତି ନେଇଛି । ଇନସଲଭୋନ୍ସି ଆଣ୍ଡ ବ୍ୟାଙ୍କରପ୍ସି କୋଡ(ଆଇବିସି) ଅଧିନରେ ଏହି ମାମଲାର ସମାଧାନ କରାଯିବ ।
ଋଣ ଭାରରରେ ବୁଡି ରହିଛି ଜେଟ । ଏପରିକି ବିମାନ ଉଡାଇବାକୁ ତେଲ କିଣିବାକୁ ମଧ୍ୟ ସାମର୍ଥ୍ୟ ନଥିବାରୁ କମ୍ପାନୀରେ ତାଲା ଝୁଲୁଛି । ତେବେ ଅନିଶ୍ଚିତତା ମଧ୍ୟ ଦେଇ ଗତି କରୁଥିବା ଏହି କମ୍ପାନୀର ମଙ୍ଗ ଧରିବାକୁ ମଧ୍ୟ ଏଯାଏ କେହି ଆଗେଇ ଆସିନାହାନ୍ତି । ବିଡ ନେଇ ଗୋଟିଏ ବି ପ୍ରସ୍ତାବ ମିଳିନାହିଁ । ଆଉ ଯେଉଁ ଗୋଟିଏ ଆସିଛି ସେଥିରେ ସର୍ତର ଲମ୍ବା ଲାଇନ ଜଡିତ ରହିଛି ।