ନୂଆଦିଲ୍ଲୀ: ବିଶ୍ବ ବଜାର ଉପରେ ବାଗଦାଦ ଏୟାରଷ୍ଟ୍ରାଇକର ନକରାତ୍ମକ ପ୍ରଭାବ । ଜୋରଦାର ବଢୁଛି ସୁନା ଦାମ । ସବୁ ରେକର୍ଡ ଭାଙ୍ଗି ଅନ୍ତଃରାଷ୍ଟ୍ରୀୟ ବଜାରରେ ସାଢେ 6 ବର୍ଷର ସର୍ବୋଚ୍ଚରେ ସୁନା ।
ସୋମବାର ସୁନା ଦାମ 10 ଗ୍ରାମ ପିଛା 916 ଟଙ୍କା ବଢି 41,096ଟଙ୍କାରେ ପହଞ୍ଚିଛି । ଏଥିସହ ଅନ୍ତରାଷ୍ଟ୍ରୀୟ ବଜାରରେ ମଧ୍ୟ ସୁନା ଆକାଶଛୁଆଁ ହେଲାଣି ।
ସୋମବାର ମଲ୍ଟି କମୋଡିଟି ଏକ୍ସଚେଞ୍ଜ ଅର୍ଥାତ ଏମସିଏକ୍ସରେ ପ୍ରଥମ କେଇ ଘଣ୍ଟାର କାରବାରବେଳେ ସୁନା ଦାମ 10 ଗ୍ରାମ ପିଛା 41,096 ଟଙ୍କା ଉଛୁଳିଥିଲା । ସେହିପରି ରୂପା ଦାମ କିଲୋ ପିଛା 1,058 ଦାମ ବୃଦ୍ଧି ସହ 48,585 ଟଙ୍କା ଛୁଇଁଛି ।
ସେପଟେ ଅନ୍ତଃରାଷ୍ଟ୍ରୀୟ ବଜାର କାମେକ୍ସରେ ସୁନା ଆଉନ୍ସ ପିଛା 26.85 ଡଲାର ବୃଦ୍ଧି ସହ 1,579.25 ଡଲାରରେ ପହଞ୍ଚିଛି । କାରବାର ସମୟରେ ଆହୁରୀ ବୃଦ୍ଧି ହେଉଛି । ଯାହାକି 2013 ସେପ୍ଟେମ୍ବର 3 ପରେ ଏହା ସବୁଠାରୁ ଅଧିକ ବୋଲି ଜଣାପଡିଛି ।
ଆମେରିକା ଓ ଇରାନ ମଧ୍ୟରେ ଚାଲିଥିବା ବିବାଦ ଯୋଗୁଁ ଗଳ୍ଫ ଦେଶରେ ଉତ୍ତେଜନା ବୃଦ୍ଧି ହେଉଛି । ଏପଟେ ଇରାନରେ କମାଣ୍ଡରଙ୍କ ମୃତ୍ୟୁର ପ୍ରତିଶୋଧ ନିଆଁ ଜଳୁଥିବାବେଳେ ଆମେରିକାର ଚେତାବନୀ ବିଶ୍ବ ବଜାରକୁ ଥରାଇରଖିଛି । ଏଥିପାଇଁ ଅନିଶ୍ଚିତତା ଭିତରେ ଚାଲିଛି କାରବାର । ନିବେଶକ ସେୟାର ବଜାରରୁ ଟଙ୍କା ଫେରସ୍ତ ନେଇ ସୁନାରେ ଲଗାଉଛନ୍ତି । ଫଳରେ ଦାମ ହୁହୁ ହୋଇ ବଢୁଛି ।