ରାହୁଲ ଇସ୍ତଫା ନ ଦେଇ ଚ୍ୟାଲଞ୍ଜକୁ ସାମ୍ନା କରନ୍ତୁ: ତେଜ ପ୍ରତାପ

ରାହୁଲ ନିଜ ପଦରୁ ଇସ୍ତଫା ଦେବା ପରିବର୍ତ୍ତେ ସମସ୍ତ ରାଜନୈତିକ ଚ୍ୟାଲଞ୍ଜକୁ ସାମ୍ନା କରିବାକୁ ପରାମର୍ଶ ଦେଇଛନ୍ତି ରାଷ୍ଟ୍ରୀୟ ଜନତା ଦଳ (ଆରଜେଡି)ର ନେତା ତେଜପ୍ରତାପ ଯାଦବ ।

ପାଟନା: ଲୋକସଭା ନିର୍ବାଚନର ନୈରାଶ୍ୟଜନକ ପ୍ରଦର୍ଶନକୁ ନେଇ କଂଗ୍ରେସ ସଭାପତି ପଦରୁ ଇସ୍ତଫା ଦେବାକୁ ଅଡି ବସିଛନ୍ତି ରାହୁଲ ଗାନ୍ଧି । ଯାହାକୁ ସହଜରେ ଗ୍ରହଣ କରିପାରୁନାହାଁନ୍ତି ଅନ୍ୟାନ୍ୟ ଦଳର ଟପ ନେତା । ରାହୁଲ ନିଜ ପଦରୁ ଇସ୍ତଫା ଦେବା ପରିବର୍ତ୍ତେ ନିଜ ପଦରେ ରହି ସମସ୍ତ ରାଜନୈତିକ ଚ୍ୟାଲଞ୍ଜକୁ ସାମ୍ନା କରିବାକୁ ପରାମର୍ଶ ଦେଇଛନ୍ତି ରାଷ୍ଟ୍ରୀୟ ଜନତା ଦଳ (ଆରଜେଡି)ର ନେତା ତେଜପ୍ରତାପ ଯାଦବ ।

ଆରଜେଡି ଅଧ୍ୟକ୍ଷ ଲାଲୁ ପ୍ରସାଦ ଯାଦବଙ୍କ ପୁଅ ତେଜପ୍ରତାପ ମଙ୍ଗଳବାର ରାହୁଲ ଗାନ୍ଧିଙ୍କ ଅଧ୍ୟକ୍ଷତାକୁ ସମର୍ଥନ କରି ଟ୍ବିଟ କରିଛନ୍ତି । ସେ କହିଛନ୍ତି ଯେ, "ମୁଁ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧିଙ୍କୁ ସମର୍ଥନ କରୁଛି । ସେ ଅଧ୍ୟକ୍ଷ ପଦରେ ରହିବା ସହ ପ୍ରତିକୂଳ ପରିସ୍ଥିତିରେ ବିଚଳିତ ନହୋଇ ଏହାକୁ ସାମ୍ନା କରିବା ଦରକାର । ଦେଶକୁ ରାହୁଲଙ୍କ ଭଳି ଜଣେ ଯୁବ ନେତାଙ୍କ ଆବଶ୍ୟକ ରହିଛି ।"