ସୁବର୍ଣ୍ଣପୁର: ପଶ୍ଚିମ ଓଡିଶାର ଏକ ଅନନ୍ୟ ଜିଲ୍ଲା ହେଉଛି ସୁବର୍ଣ୍ଣପୁର ବା (ସୋନପୁର) ଯେଉଁ ଜିଲ୍ଲାରେ ସ୍ବଂୟ ମହାପ୍ରଭୁ ଜଗନ୍ନାଥ ପାତାଳୀ ହୋଇଥିବା ବେଳେ ମହାନଦୀ ଗର୍ଭରେ ପୂଜା ପାଉଛନ୍ତି ଦେବୀ ଲଙ୍କେଶ୍ବରୀ । ଏହାସହ ମହାନଦୀ କୂଳରେ ପୂଜିତ ହେଉଛନ୍ତି ବାବା ସୁବର୍ଣ୍ଣମେରୁ, ରାମେଶ୍ବର । ସହରର ଭିତରେ ଓ ବାହାରେ ଅନେକ ସଂଖ୍ୟାରେ ଦେବାଦେବୀ ପୂଜିତ ହେଉଥିବାବେଳେ ସମଗ୍ର ସୁବର୍ଣ୍ଣପୁରରେ ଆବାହାନ କାଳରୁ ରହିଛି ବହୁ ପୁରାତନ ମନ୍ଦିର ଯେଉଁଥିପାଇଁ ସୁବର୍ଣ୍ଣପୁରକୁ ମନ୍ଦିର ମାଳିନୀ ସହର ମଧ୍ୟ କୁହାଯାଏ । ଜିଲ୍ଲାରେ ଭରି ରହିଛି ପର୍ଯ୍ୟଟନର ସମ୍ଭାର । ମହାନଦୀ, ଅଙ୍ଗ, ଶୁକତେଲ ଓ ତେଲ ନଦୀ ବହିଯାଇଥିବାବେଳେ ଜିଲ୍ଲାର ଶିଳ୍ପ ତଥା ସମ୍ବଲପୁର ପାଟ ବସ୍ତ୍ର ପ୍ରସ୍ତୁତି ଓ ଛୋଟମୋଟ କୁଟୀର ଶିଳ୍ପ ପାଇଁ ଜିଲ୍ଲା ବେଶ ପ୍ରସିଦ୍ଧ । ତେବେ ସୁବର୍ଣ୍ଣପୁରର ବିଧାୟକ ନିରଞ୍ଜନ ପୁଝାରୀ ରାଜ୍ୟ ମନ୍ତ୍ରୀମଣ୍ଡଳରେ ପ୍ରତିନିଧିତ୍ବ କରୁଥିଲେ ମଧ୍ୟ ବସଷ୍ଟାଣ୍ଡରେ ଗୋଟିଏ ଯାତ୍ରୀ ବିଶ୍ରାମାଗାର ନ ହେବା ପରିତାପର ବିଷୟ ।
ଏହାସହ ସୁବର୍ଣ୍ଣମେରୁ, ବାବା ରାମେଶ୍ବର, ଦେବୀ ସୁରେଶ୍ବରୀ, ମେଟାକାନୀ ପ୍ରଭୃତି ଦେବାଦେବୀ ପୂଜା ପାଇ ଆସୁଛନ୍ତି । ଆଉ ଏହି ସବୁକୁ ଦେଖିବା ପାଇଁ ଜିଲ୍ଲା ଓ ଜିଲ୍ଲା ବାହାରୁ ଅନେକ ପର୍ଯ୍ୟଟକ ଆସୁଛନ୍ତି , କିନ୍ତୁ ସହରରେ ଥିବା ବସଷ୍ଟାଣ୍ଡର ଯାତ୍ରୀ ବିଶ୍ରାମଗାରର ନଗ୍ନ ଅବସ୍ଥା ପାଇଁ ଯାତ୍ରୀ ନାହିଁ ନଥିବା ଅସୁବିଧା ଭୋଗୁଛନ୍ତି । ବିଶ୍ରାମାଗାର ଭଗ୍ନ ଅବସ୍ଥାରେ ଥିବାବେଳେ ଯାତ୍ରୀଙ୍କ ପାଇଁ କୌଣସି ମୌଳିକ ସୁବିଧା ବି ନାହିଁ ।