କେନ୍ଦୁଝର: ଗାଁର ଉନ୍ନତି ପାଇଁ ସରକାର ବ୍ୟାପକ ଅର୍ଥ ବ୍ୟୟ ବରାଦ କରୁଛନ୍ତି । ମୌଳିକ ସୁବିଧା ପାଇଁ ଖର୍ଚ୍ଚ ହେଉଛି ପୁଳାପୁଳା ଟଙ୍କା । ହେଲେ ଗାଁର କେତେ ଉନ୍ନତି ହେଉଛି, ଆଉ ସରକାରୀ ବାବୁ ନିଜ ଦାୟିତ୍ବ କେତେ ସମ୍ପାଦନ କରୁଛନ୍ତି ତାହାର ଜ୍ବଳନ୍ତ ଉଦାହରଣ ହେଉଛି କେନ୍ଦୁଝର ବଣ ଜଙ୍ଗଲ ଘେରା କୁସୁମିତା-ଫୁଲଝର ରାସ୍ତା । ରାସ୍ତା ପାଇଁ ଟଙ୍କା ଆସିଲା । ଠିକାଦାରକୁ କାମ ନିର୍ଦ୍ଦେଶ ଦିଆଗଲା । ହେଲେ କାମ ଅଧାରେ ଛାଡି ଠିକାଦାର ଛୁ ମାରିଛି ।
ନିର୍ମାଣ ହେଉଥିବା ରାସ୍ତା ଏବେ ଯେମିତି ସାହାରା ଖୋଜୁଛି । ଆଉ ଲୋକେ ଭୋଗୁଛନ୍ତି ଯନ୍ତ୍ରଁଣା ପରେ ଯନ୍ତ୍ରଣା । ସ୍ଥାନୀୟ ପ୍ରଶାସନ ଯେମିତି ଏଠାରେ କୋମାରେ । ହେଲେ ପ୍ରଶ୍ନ ଉଠୁଛି ଆରମ୍ଭ ହୋଇଗଲାଣୀ ବର୍ଷା ଋତୁ । ଏହି ଅଧାପନ୍ତରିଆ ରାସ୍ତାରେ ଲୋକେ ଯିବେ କେମିତି ?
ଏହା ପ୍ରଶାସନର ମନମୁଖୀ କାର୍ଯ୍ୟର ଏକ ଜ୍ବଳନ୍ତ ଉଦାହରଣ । ଆପଣ ବି ଏ ଦୃଶ୍ୟ ଦେଖିଲେ ଏହାର ପ୍ରମାଣ ପାଇପାରିବେ । ଭଲ କରି ଦେଖନ୍ତୁ ଏ ଦୃଶ୍ୟକୁ । ରାସ୍ତା ପାର ହେବାକୁ ହେଲେ କେମିତି କାଦୁଅରେ ପସିବାକୁ ହୁଏ । ପଥର ଉପରେ କିପରି ବିପଜ୍ଜନକ ଭାବେ ଗାଡି ଚଲାଇବାକୁ ପଡୁଛି । ପଥର ଓ ଖାଲଖମାରେ ଭର୍ତ୍ତି ସଂକୀର୍ଣ୍ଣ ରାସ୍ତାରେ ଯାତାୟତ କରୁଛି ଗାଡିମୋଟର । ଅତି ବିପଦପୂର୍ଣ୍ଣ ହୋଇପଡିଛି କେନ୍ଦୁଝର ବଣ ଜଙ୍ଗଲ ଘେରା କୁସୁମିତା-ଫୁଲଝର ରାସ୍ତା ।