ଭୁବନେଶ୍ବର: ବାତ୍ୟା 'ଫନି' ଯିବାର ଇତିମଧ୍ୟରେ 9ଦିନ ବିତି ଯାଇଛି । ହେଲେ ଫନି ଦେଇଯାଇଥିବା ଯନ୍ତ୍ରଣାରୁ ଲୋକେ ମୁକୁଳି ପାରୁନାହାନ୍ତି । ଏବେବି ରାଜଧାନୀର ଅନେକ ଅଞ୍ଚଳକୁ ବିଜୁଳି ପାଣି ପହଞ୍ଚି ପାରି ନାହିଁ । ସାଧାରଣ ଜନତା ପାଣି ବିଜୁଳି ନପାଇ ତ୍ରାହି ତାହ୍ରି ଡାକିଲେଣି । ସେପଟେ ଯୁଦ୍ଧକାଳୀନ ଭିତ୍ତିରେ ବିଦ୍ୟୁତ ପୁନଃ ନିର୍ମାଣ ଚାଲିଥିଲେ ମଧ୍ୟ ରାଜଧାନୀର ସବୁ ଅଞ୍ଚଳକୁ ବିଦ୍ୟୁତ ଯୋଗାଇବା ସମ୍ଭବପର ହୋଇନାହିଁ ।
ଆଉ ସରକାର ବିଦ୍ୟୁତ ସ୍ବାଭାବିକ ପାଇଁ ଗୋଟିଏ ପରେ ଗୋଟିଏ ତାରିଖ ଦେଇଚାଲିଛନ୍ତି । କିନ୍ତୁ ସରକାରଙ୍କ କଥାକୁ ଲୋକେ ଆଉ ବିଶ୍ବାସ କରିବା ସ୍ଥିତିରେ ନାହାନ୍ତି । ଆଜି ତୁରନ୍ତ ବିଦ୍ୟୁତ ଯୋଗାଣ ଦାବି କରି ଭୁବନେଶ୍ବରରେ ତେଜିଥିଲା ଜନଅସନ୍ତୋଷ । ଏହି ଅସନ୍ତୋଷ ଆସି ପହଞ୍ଚିଯାଇଥିଲା ରାଜରାସ୍ତାରେ ବିଦ୍ୟୁତ ପ୍ରଦାନ ଦାବିରେ ସାମନ୍ତରାୟପୁର ଅଞ୍ଚଳର ଲୋକମାନେ ଆଜି ରାସ୍ତାବନ୍ଦ କରି କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିଥିଲେ । ଫଳରେ ରାଜରାସ୍ତାରେ ବିକ୍ଷୋଭକାରୀମାନେ ଯାତାୟତ କରୁଥିବା ଗାଡି ମଟର ଗୁଡିକୁ ଅନେକ ସମୟ ଧରି ଯିବାକୁ ଦେଇ ନଥିଲେ।