ଅନୁଗୋଳ: ପର୍ବତାରୋହିଣୀ କଳ୍ପନା ଦାସଙ୍କ ପାର୍ଥିବ ଶରୀର ରବିବାର ଭୁବନେଶ୍ବରରେ ପହଞ୍ଚିବା ପରେ ଅପରାହ୍ଣରେ ଜନ୍ମମାଟି ଢେଙ୍କାନାଳକୁ ଅଣାଯାଇଥିଲା । ଢେଙ୍କାନାଳ ମିନି ଷ୍ଟାଡିୟମରେ ତାଙ୍କ ଶେଷ ଦର୍ଶନ କରିଥିଲେ ଢେଙ୍କାନାଳବାସୀ । ତେବେ କଳ୍ପନାଙ୍କ ପାର୍ଥିବ ଶରୀର ଜନ୍ମମାଟିରେ ପହଞ୍ଚିବା ପରେ ସେଠାରେ ଏକ ଭାବବିହ୍ବଳ ପରିବେଶ ଦେଖିବାକୁ ମିଳିଥିଲା ।
ଭିଡିଓ ସୌଜନ୍ୟ: ସମ୍ବାଦଦାତା, ଅନୁଗୋଳ
କଳ୍ପନା 'ଅମର ରହେ' ଧ୍ୱନିରେ ପ୍ରକମ୍ପିତ ହୋଇଉଠିଥିଲା ସାରା ସହର । ଷ୍ଟାଡିୟମରେ ତାଙ୍କ ପାର୍ଥିବ ଶରୀର ଉପରେ ପୁଷ୍ପମାଲ୍ୟ ଅର୍ପଣ କରିବା ସହ ଶ୍ରଦ୍ଧାଞ୍ଜଳି ଦେଇଥିଲେ ଜିଲ୍ଲା ପ୍ରଶାସକ ଓ ରାଜନୈତିକ ନେତୃବୃନ୍ଦ । ସାଂସଦ ମହେଶ ସାହୁ, ବିଧାୟକ ସୁଧୀର କୁମାର ସାମଲ, ଜିଲ୍ଲାପାଳ ନିଖିଳ ପରଓ୍ବାନ କଲ୍ୟାଣ ସମେତ ଅଞ୍ଚଳବାସୀ ତାଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ । ଷ୍ଟାଡିୟମରେ ଦର୍ଶନ ପରେ ତାଙ୍କୁ ନିଜ ଘର କୁମ୍ଭାର ସାହି ନିଆଯାଇଛି । ସେଠାରୁ ଦର୍ଶନ ପରେ ତାଙ୍କୁ ପୁରୀ ସ୍ବର୍ଗଦ୍ବାର ନେବାର କାର୍ଯ୍ୟକ୍ରମ ରହିଛି ।