ବାଲେଶ୍ୱର: ଧାନମଣ୍ଡି ବନ୍ଦ ରହିବାରୁ ମଣ୍ଡି ଆଗରେ ଧାରଣା ଦେଲେ ଚାଷୀ । ବର୍ଷ ତମାମ ଅମଳ କରିଥିବା ଧାନ ବିକ୍ରି କରିପାରୁନଥିବାରୁ ଚାଷୀଙ୍କ ମଧ୍ୟରେ ବୃଦ୍ଧି ପାଇଛି ଅସନ୍ତୋଷ । ଏଭଳି ଦୃଶ୍ୟ ଦେଖିବାକୁ ମିଳିଛି ବାଲେଶ୍ବର ଜିଲ୍ଲା ବାଲିଆପାଳ ବ୍ଲକ ଅନ୍ତର୍ଗତ ବଡାସ ସେବା ସମବାୟ ସମିତି ସରକାରୀ ଧାନ ମଣ୍ଡିରେ ।
ଭିଡିଓ ସୌଜନ୍ୟ: ସମ୍ବାଦଦାତା, ବାଲେଶ୍ବର ଦୀର୍ଘ ଦିନ ଧରି ଧାନ କିଣା ନ ହେବାରୁ ଚାଷୀକୂଳ ଏକତ୍ରିତ ହୋଇ ଧାରଣା ଦେଇଥିବା ଜଣାପଡିଛି । ଚାଷୀମାନେ ନିଜ ନିଜର ଉପାର୍ଜିତ ଧାନକୁ ବିକ୍ରି କରି ନ ପାରି ଅଭାବୀ ବିକ୍ରିର ଶିକାର ହେଉଛନ୍ତି । ବାଧ୍ୟ ହୋଇ ଅଳ୍ପ ମୂଲ୍ୟରେ ଧାନ ବଙ୍ଗୀୟ ବେପାରୀଙ୍କୁ ଟେକି ଦେଉଛନ୍ତି । ତେବେ ବଡାସ ସୋସାଇଟିରେ ପଞ୍ଜିକୃତ ଚାଷୀଙ୍କ ମଧ୍ୟରୁ 60 ପ୍ରତିଶତ ଚାଷୀ ଧାନ ବିକ୍ରି କରିଥିବାବେଳେ ଆହୁରି 40ପ୍ରତିଶତ ଚାଷୀ ଧାନ ବିକ୍ରି କରିପାରିନଥିବା କହିଛନ୍ତି ସମ୍ପାଦକ ।
ସରକାରୀ ଟାର୍ଗେଟ ସରିଯାଇଥିବାବେଳେ ସରକାର ଟାର୍ଗେଟ ନ ଦେଲେ ଧାନ କିଣାଯାଇ ପାରିବ ନାହିଁ ବୋଲି ସୂଚନା ମିଳିଛି । ଅନ୍ୟପଟେ ଚାଷୀଙ୍କର ଖରିଫ ଧାନ ପଡିରହିଥିବାବେଳେ ପୁଣି ରବି ଋତୁର ଚାଷ ପାଇଁ ପଞ୍ଜିକରଣ ଆରମ୍ଭ ହେଲାଣି । ଏହାକୁ ନେଇ ଚାଷୀ ଏବେ ମୁଣ୍ଡରେ ହାତ ଦେଇ ବସିଛନ୍ତି । ପ୍ରକାଶ ଥାଉକି ଧାନ ମଣ୍ଡିରେ ଅଭାବୀ ଧାନ ବିକ୍ରି ପ୍ରତିବାଦରେ ବସ୍ତା ନିର୍ବାଚନ ମଣ୍ଡଳୀରେ ଥିବା ସମସ୍ତ ସୋସାଇଟିରେ ବାରମ୍ବାର ଧାରଣା ଓ ବିକ୍ଷୋଭ ହୋଇଆସୁଥିଲା ।
ଏହାକୁ ନେଇ ବସ୍ତା ବିଜେପି ପକ୍ଷରୁ ଗତ କିଛି ଦିନ ତଳେ ରାଜରାସ୍ତା ଅବରୋଧ କରାଯାଇଥିଲା । ଏହି ଅବସରରେ ବାଲେଶ୍ଵର ସିଏସଓ ଘଟଣାସ୍ଥଳରେ ପହଞ୍ଚି ତୁରନ୍ତ ପଦକ୍ଷେପ ନେବାକୁ ପ୍ରତିଶୃତି ଦେଇଥିଲେ । ହେଲେ ପ୍ରତିଶୃତିକୁ ଗୋଟେ ମାସ ବିତିଯାଇଥିଲେ ମଧ୍ୟ ଏଯାଏଁ ସରକାରୀ ସ୍ତରରେ କୌଣସି ପଦକ୍ଷେପ ନିଆଯାଇ ନଥିବା ଚାଷୀମାନେ ଅଭିଯୋଗ କରିଛନ୍ତି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
