ମଧ୍ୟ ଭୁବନେଶ୍ବର ବିଜେପି ପ୍ରାର୍ଥୀଙ୍କ ଗାଡିକୁ ବୋମାମାଡ

ତୃତୀୟ ପର୍ଯ୍ୟାୟ ନିର୍ବାଚନ ପାଇଁ ରବିବାର ସନ୍ଧ୍ୟାରେ ଶେଷ ହୋଇଛି ପ୍ରଚାର । ଯେଉଁଥିରେ ଭୁବନେଶ୍ୱର ମଧ୍ୟ ବିଜେପି ବିଧାୟକ ପ୍ରାର୍ଥୀ ଜଗନ୍ନାଥ ପ୍ରଧାନଙ୍କ ଗାଡିକୁ ବୋମାମାଡ଼ ହୋଇଥିବା ଅଭିଯୋଗ ହୋଇଛି । ଘଟଣାରେ ଗାଡିର କାଚ ଭାଙ୍ଗି ଥିବାବେଳେ ଅଳ୍ପକେ ବର୍ତ୍ତି ଯାଇଛନ୍ତି ଜଗନ୍ନାଥ ।

ଭୁବନେଶ୍ୱର: ନିର୍ବାଚନ ଯେତିକି ପାଖେଇ ଆସୁଛି ସେତିକି ଅଶାନ୍ତ ହେଉଛି ରାଜଧାନୀ । ଏନେଇ ତୃତୀୟ ପର୍ଯ୍ୟାୟ ନିର୍ବାଚନ ପାଇଁ ରବିବାର ସନ୍ଧ୍ୟାରେ ଶେଷ ହୋଇଛି ପ୍ରଚାର। ଯେଉଁଥିରେ ଭୁବନେଶ୍ୱର ମଧ୍ୟ ବିଜେପି ବିଧାୟକ ପ୍ରାର୍ଥୀ ଜଗନ୍ନାଥ ପ୍ରଧାନଙ୍କ ଗାଡିକୁ ଲକ୍ଷ୍ୟକରି ବୋମାମାଡ଼ ହୋଇଥିବା ଅଭିଯୋଗ ହୋଇଛି ।

ସୂଚନା ଅନୁଯାୟୀ ୮ ନଂ ଡେଲ୍ଟା କଲୋନୀ ନିକଟରେ ପ୍ରଚାର ସାରି ବିଜେପି ପାର୍ଟି ଅଫିସ ସମ୍ମୁଖରେ ସେ ଗାଡିରୁ ଓହ୍ଲାଉଥିବା ସମୟରେ ଏହି ଆକ୍ରମଣ ହୋଇଥିବା ଜଣାପଡିଛି । ଘଟଣାରେ ଗାଡିର କାଚ ଭାଙ୍ଗି ଥିବା ବେଳେ ଅଳ୍ପକେ ବର୍ତ୍ତିଛନ୍ତି ଜଗନ୍ନାଥ ।

ଖବର ପାଇ ସ୍ଥାନୀୟ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ଅନ୍ୟପଟେ ଜଗନ୍ନାଥଙ୍କ ଅଭିଯୋଗ ରହିଛି କି ରାଜନୈତିକ ଆକ୍ରୋଶ ରଖି କିଛି ଅସାମାଜିକ ବ୍ୟକ୍ତି ଏଭଳି କରିଛନ୍ତି । ପୂର୍ବରୁ ଠିକ ୟୁନିଟ ୮ ଅଞ୍ଚଳରେ ତାଙ୍କ ଉପରକୁ ବୋମାମାଡ଼ ହୋଇଥିବା ନେଇ ସେ ଥାନାରେ ଅଭିଯୋଗ କରିଥିଲେ।

ଭୁବନେଶ୍ୱରରୁ ସଞ୍ଜୀବ ରାୟ, ଇଟିଭି ଭାରତ