ନୂଆଦିଲ୍ଲୀ: ଅରୁଚିକର ମନ୍ତବ୍ୟ ଦେଇ ବିବାଦ ଘେରରେ ଉତ୍ତରପ୍ରଦେଶ ରାମପୁରର ସମାଜବାଦୀ ଦଳର ପ୍ରାର୍ଥୀ ଆଜମ ଖାନ । ବଲିଉଡ ଅଭିନେତ୍ରୀ ତଥା ରାମପୁର ବିଜେପି ପ୍ରାର୍ଥୀ ଜୟପ୍ରଦାଙ୍କୁ ନେଇ ସେ ଅରୁଚିକର ମନ୍ତବ୍ୟ ଦେଇଥିଲେ । ଅନ୍ୟପଟେ ଆଜମ ଖାନ ଜୟପ୍ରଦାଙ୍କୁ ନେଇ କୌଣସି ବୟାନ ଦେଇନାହାନ୍ତି ବୋଲି ନିଜ ସଫେଇ ଦେଇଛନ୍ତି ।
ପ୍ରକାଶ ଯେ, ରାମପୁରରେ ଆୟୋଜିତ ଏକ ରାଲିରେ ଜୟପ୍ରଦାଙ୍କ ବିରୋଧରେ 'ଖାକି ଅଣ୍ଡରୱିୟର' ଭଳି ଆପତ୍ତିଜନକ ମନ୍ତବ୍ୟ ଦେଇଥିଲେ ଆଜମ ଖାନ । ତେବେ ଚଳିତ 2019 ଲୋକସଭା ନିର୍ବାଚନରେ ରାମପୁର ଲୋକସଭା ଆସନରୁ ଆଜମ ଖାନଙ୍କୁ ଟକ୍କର ଦେବାକୁ ମୈଦାନକୁ ଓହ୍ଲାଇଛନ୍ତି ବିଜେପି ପ୍ରାର୍ଥୀ ଜୟପ୍ରଦା । ଏକ ସମୟରେ ଜୟପ୍ରଦା ସମାଜବାଦୀ ପାର୍ଟିର ଷ୍ଟାର ପ୍ରଚାରକ ଥିଲେ । ଆଜମ ଖାନ ତାଙ୍କୁ ରାମପୁର ଆସନରୁ ଲଢିବା ପାଇଁ ଆଣିଥିଲେ ।
ରବିବାର ଆଜମ ଖାନ ଏକ ଜନସଭାରେ ଜୟପ୍ରଦାଙ୍କୁ ଟାର୍ଗେଟ କରିଥିଲେ । ସେ କହିଥିଲେ ଯେ, 'ଯାହାକୁ ଆମେ ଆଙ୍ଗୁଳି ଧରି ରାମପୁର ଆଣିଲୁ, ଆପଣମାନେ ଯାହାକୁ ୧୦ ବର୍ଷ ପ୍ରତିନିଧିତ୍ୱ କରାଇଲେ, ତାଙ୍କୁ ଚିହ୍ନିବାକୁ ଆପଣଙ୍କୁ ୧୭ ବର୍ଷ ଲାଗିଗଲା । କିନ୍ତୁ ମୁଁ ମାତ୍ର ୧୭ ଦିନ ଭିତରେ ତାଙ୍କୁ ଚିହ୍ନି ନେଇଥିଲେ ଯେ, ତାଙ୍କ ଅଣ୍ଡରୱିଅର ରଙ୍ଗ ଖାକି ।' ତେବେ ଆଜମ ନିଜର ଏହି ବୟାନରେ ଜୟପ୍ରଦାଙ୍କ ନାଁ ନେଇନଥିଲେ ମଧ୍ୟ ତାଙ୍କ ନାମକୁ ଏହି ବୟାନରେ ଯୋଡା ଯାଉଛି ।
ସେ କହିଛନ୍ତି ଯେ, ରାମପୁରରେ ମୁଁ 9 ଥର ବିଧାୟକ ଓ ଗୋଟିଏ ଥର ମନ୍ତ୍ରୀ ହୋଇଛି । ତେଣୁ ମୁଁ କଣ କହିବି ତାହା ମୋତେ ଭଲ ଭାବେ ଜଣାଅଛି । ଯଦି କେହି ବ୍ୟକ୍ତି ମୁଁ କହିଥିବା କଥାରେ କାହାର ନାଁ ନେଇଥିବା ପ୍ରମାଣ କରି ଦିଅନ୍ତି, ତେବେ ମୁଁ 2019 ଲୋକସଭା ନିର୍ବାଚନ ଲଢିବି ନାହିଁ । ଏଥିସହିତ ତାଙ୍କ କଥାକୁ ଗଣମାଧ୍ୟମ ବଢେଇଚଢେଇ କରି କହୁଥିବା ସେ ଅଭିଯୋଗ ଆଣିଛନ୍ତି ।
ସେପଟେ ଆଜମ ଖାନଙ୍କ ଏହି ବୟାନରେ କ୍ଷୋଭ ପ୍ରକାଶ କରିଛି ମହିଳା ଆୟୋଗ। ଏହି ପରିପ୍ରେକ୍ଷୀପରେ ରାଷ୍ଟ୍ରୀୟ ମହିଳା ଆୟୋଗର ଅଧ୍ୟକ୍ଷ ରେଖା ଶର୍ମା ତାଙ୍କୁ କାରଣ ଦର୍ଶାଅ ନୋଟିସ ଜାରି କରିଛନ୍ତି ।
