ଗୋଟିଏ ବର୍ଷ ଆଶଙ୍କା, ଚିନ୍ତା, ଅବସାଦ ଏବଂ ଅନିଶ୍ଚିତତା ମଧ୍ୟରେ ବିତିଲା ପରେ ଶେଷରେ ମହାମାରୀ କୋରୋନା ବିରୋଧରେ ଟିକାକରଣ ଅଭିଯାନ ସାରା ବିଶ୍ୱରେ ଆରମ୍ଭ ହୋଇଯାଇଛି । ବିଶ୍ୱର ପ୍ରାୟ ସବୁଦେଶରେ ଚାଲିଛି ଟିକାକରଣ ଅଭିଯାନ । ସବୁଠୁ ପ୍ରଭାବଶାଳୀ ଟିକା ପ୍ରସ୍ତୁତ ପାଇଁ କିଛି ଦେଶ ମଧ୍ୟରେ ପ୍ରତିଯୋଗିତା ଜାରି ରହିଥିବା ବେଳେ ଆମ ଭାରତ ଭଳି କିଛି ଦେଶ ନିଜ ପାଇଁ ଅନୁମୋଦିତ ଟିକା ପ୍ରସ୍ତୁତ କରିବା ସହ ଅନ୍ୟଦେଶକୁ ବି ଆବଶ୍ୟକ ଅନୁସାରେ ରପ୍ତାନୀ କରୁଛନ୍ତି ।
କୋଭିଡ ଟିକାକରଣ ଅଭିଯାନରେ କେଉଁ ଦେଶ ଆଗୁଆ? ସବୁ ଦେଶ ନିଜର ପ୍ରତି ନାଗରିକଙ୍କୁ ଟିକା ଦିଆଯିବା ନେଇ ଲକ୍ଷ୍ୟ ଧାର୍ଯ୍ୟ କରିଥିଲେ ମଧ୍ୟ ସବୁଠି ଟିକାକରଣର ଗତି ସମାନ ନାହିଁ । ଅନୁମୋଦିତ ଟିକା ମଧ୍ୟରୁ ଅଧିକାଂଶ ଦୁଇଥର ଦିଆଯିବାର ବ୍ୟବସ୍ଥା ରହିଛି । ଅର୍ଥାତ୍ ଦୁଇ ଡୋଜ୍ ଟିକା ନେଲେ ହିଁ ଏହା ପ୍ରଭାବଶାଳୀ ହୋଇପାରିବ । ଭାରତରେ ବର୍ତ୍ତମାନ ଦୁଇଟି କୋରୋନା ବିରୋଧୀ ଟିକା ଦିଆଯାଉଛି । ଗୋଟିଏ ହେଉଛି ଭାରତ ବାୟୋଟେକ୍ର କୋଭାକ୍ସିନ ଓ ଆଷ୍ଟ୍ରାଜେନେକାର କୋଭିସିଲ୍ଡ । ଉଭୟ ଟିକାର ଦୁଇଟି ଲେଖାଏଁ ଡୋଜ୍ ନେବାକୁ ପଡୁଛି । ପ୍ରଥମର ୨୮ ଦିନ ପରେ ଦ୍ୱିତୀୟ ଡୋଜ୍ ନେବାର ବ୍ୟବସ୍ଥା ଥିଲା । କିନ୍ତୁ କେନ୍ଦ୍ର ସରକାର ଗାଇଡଲାଇନ୍ସରେ ପରିବର୍ତ୍ତନ କରି ଦୁଇଟି ଡୋଜ୍ ମଧ୍ୟରେ ସମୟସୀମା ଦୁଇ ମାସ ରଖିଛନ୍ତି ।
ଭାରତରେ କୋଭିଡ ଟିକାକରଣ ଅଭିଯାନ ଏହି ବର୍ଷ ଜାନୁଆରୀ ୧୬ ତାରିଖରେ ଆରମ୍ଭ ହୋଇଥିଲା । ସମ୍ମୁଖଭାଗ ସ୍ୱାସ୍ଥ୍ୟକର୍ମୀ ଓ କୋରୋନା ଯୋଦ୍ଧାଙ୍କୁ ପ୍ରାଥମିକତା ଦିଆଯାଇଥିଲା । ମାର୍ତ୍ତମାସରୁ ସହରୁଗଣତାରେ ପୀଡିତ ଥିବା ୪୫ ବର୍ଷରୁ ଅଧିକ ବୟସର ଲୋକ ଓ ୬୦ ବର୍ଷରୁ ଅଧିକ ବୟସର ବରିଷ୍ଠ ନାଗରିକଙ୍କ କୋଭିଡ ଟିକାକରଣ ଆରମ୍ଭ ହୋଇଥିଲା । ଜନ ହପକିନ୍ସ ବିଶ୍ୱବିଦ୍ୟାଳୟର ରିପୋର୍ଟ ଅନୁସାରେ ମାର୍ଚ୍ଚ ୧୯ , ୨୦୨୧ ସୁଦ୍ଧା ୬୯ ଲକ୍ଷ ୧୩ ହଜାର ୫୮୭ ଭାରତୀୟଙ୍କ ପୂର୍ଣ୍ଣ ଟିକାକରଣ ହୋଇଛି , ଯାହା କି ଭାରତର ଜନସଂଖ୍ୟାର ମାତ୍ର ଶୂନ ଦଶମିକ ୫୧ ପ୍ରତିଶତ ।
ତେବେ ସଂପୂର୍ଣ୍ଣ ଟିକାକରଣ ହୋଇଥିବା ଲୋକଙ୍କ ସଂଖ୍ୟା ଦୃଷ୍ଟିରୁ ଶ୍ରେଷ୍ଠ ୨୦ଟି ଦେଶ ମଧ୍ୟରେ ଭାରତର ସ୍ଥାନ ଏବେ ଦ୍ୱିତୀୟ ରହିଛି । ଏହି ତାଲିକାର ପ୍ରଥମ ସ୍ଥାନରେ ରହିଛି ଯୁକ୍ତରାଷ୍ଟ୍ର ଆମେରିକା । ସେହିଦେଶରେ ଏ ଯାଏଁ ମୋଟ କୋଟି ୯୦ ଲକ୍ଷ ୮୧ ହଜାର ୩୩୦ ଲୋକଙ୍କ ସଂପୂର୍ଣ୍ଣ ଟିକାକରଣ ହୋଇଛି ,ଯାହା କି ମୋଟ ଜନସଂଖ୍ୟାର ୧୧ ଦଶମିକ ୯୪ ପ୍ରତିଶତ । ଆମେରିକାରେ ଫାଇଜର-ବାୟୋନଟେକ, ମଡେର୍ଣ୍ଣା, ଜନସନ ଆଣ୍ଡ ଜନସନ /ଜାସେନ ଟିକା ବ୍ୟବହାର ହେଉଛି । ଆଉ ଦୁଇଟି ଟିକା ସବୁଜ ସଂକେତ ଅପେକ୍ଷାରେ ଅଛନ୍ତି । ଭାରତ ପରେ ତୃତୀୟ ସ୍ଥାନରେ ରହିଛି ଇସ୍ରାଏଲ । ସେଠାରେ ୪୪ ଲକ୍ଷ ୮୦ ହଜାର ୮୧୦ ଲୋକଙ୍କ ସଂପୂର୍ଣ୍ଣ ଟିକାକରଣ ହୋଇଛି, ଯାହା କି ସେ ଦେଶର ଜନସଂଖ୍ୟାର ୫୦ ପ୍ରତିଶତରୁ ଅଧିକ । ଇସ୍ରାଏଲରେ ଫାଇଜର-ବାୟୋନଟେକ୍ ଟିକା ବହୁଳ ଭାବେ ବ୍ୟବହାର ହେଉଛି । ପୂର୍ଣ୍ଣ ଟିକାକରଣ ଦୃଷ୍ଟିରୁ ବିଶ୍ୱର ଶ୍ରେଷ୍ଠ ୨୦ଟି ଦେଶ ହେଲା –
- ୧. ଯୁକ୍ତରାଷ୍ଟ୍ର ଆମେରିକା- ୩, ୯୦, ୮୧, ୩୩୦
- ୨. ଭାରତ- ୬୯, ୧୩ , ୫୮୭
- ୩. ଇସ୍ରାଏଲ – ୪୪,୮୦ ୮୧୦
- ୪. ତୁର୍କି-୪୪, ୩୯,୯୭୨
- ୫. ବ୍ରାଜିଲ-୩୩, ୦୩, ୦୯୪
- ୬. ଜର୍ମାନୀ -୩୦, ୯୭, ୦୯୪
- ୭. ଚିଲି -୨୬, ୯୨, ୯୨୩
- ୮. ଋଷିଆ ୨୪, ୭୮, ୩୯୦
- ୯. ଇଟାଲୀ -୨୩, ୦୩, ୦୦୨
- ୧୦. ଫ୍ରାନସ-୨୨, ୯୭, ୧୦୦
- ୧୧. ୟୁଏଇ -୨୧, ୮୭, ୮୪୯
- ୧୨. ମରକ୍କୋ-୨୧ ୧୬, ୦୮୧
- ୧୩. ଇଣ୍ଡୋନେସିଆ -୧୯, ୪୮, ୫୩୧
- ୧୪. ସ୍ପେନ-୧୮, ୮୬, ୮୧୩
- ୧୫. ୟୁକେ-୧୮, ୭୯, ୦୫୪
- ୧୬. ପୋଲାଣ୍ଡ- ୧୬, ୬୪, ୫୨୪
- ୧୭.ସର୍ବିଆ – ୮,୨୬, ୮୫୧
- ୧୮. ରୋମାନିଆ – ୭,୫୨, ୯୩୯
- ୧୯. ମେକ୍ସିକୋ -୬, ୪୬, ୮୦୨
- ୨୦. କାନାଡା -୬, ୧୫, ୬୮୧
ଯଦି ଆମେ ଜନସଂଖ୍ୟାର କେତେ ଭାଗ ପୂର୍ଣ୍ଣ ଟିକାକରଣ ହୋଇଛି ବୋଲି ଦେଖିବା, ତାହା ହେଲେ ଇସ୍ରାଏଲ ପ୍ରଥମ ସ୍ଥାନରେ ରହିଛି । ଏହି କ୍ଷେତ୍ରରେ ଇସ୍ରାଏଲ ନିଜ ଜନସଂଖ୍ୟାର ୫୧ ପ୍ରତିଶତ ଲୋକଙ୍କର ପୂର୍ଣ୍ଣ ଟିକାକରଣ କରିଛି । ଏହି ତାଲିକାର ଦ୍ୱିତୀୟ ସ୍ଥାନରେ ରହିଛି ସିଚେଲସ୍ । ଏହି ଦେଶ ନିଜ ଜନସଂଖ୍ୟାର ୨୯ ପ୍ରତିଶତ ଲୋକଙ୍କ ପୂର୍ଣ୍ଣ ଟିକାକରଣ କରିଛି । ମୋନାକୋ ୧୯ ପ୍ରତିଶତ, ଚିଲି ଓ ବାହାରିନ ୧୫ ପ୍ରତିଶତ ଲେଖାଏଁ ଓ ଆମେରିକା ୧୩ ପ୍ରତିଶତ ସହ ପଂଚମ ସ୍ଥାନରେ ରହିଛି ।
କିଛି ଦିନ ତଳେ କେତେକ ୟୁରୋପୀୟ ଦେଶ ଅକ୍ସଫୋର୍ଡ-ଆଷ୍ଟ୍ରାଜେନକା ଟିକାର ବ୍ୟବହାରକୁ ସ୍ଥଗିତ ରଖିଥିଲେ । ଏହି ଟିକା ଦ୍ୱାରା ଲୋକଙ୍କର ରକ୍ତ ଜମାଟ ହେଉଛି ବୋଲି ରିପୋର୍ଟ ପରିପ୍ରେକ୍ଷୀରେ ଟିକା ବ୍ୟବହାରକୁ ଜର୍ମାନୀ, ଇଟାଲୀ, ଫ୍ରାନଓ, ସ୍ୱିଡେନ ଓ ଲାଟଭିଆ ଭଳି ଦେଶ ସ୍ଥଗିତ ରଖିଥିଲେ । କିନ୍ତୁ ବିଶ୍ୱ ସ୍ୱାସ୍ଥ୍ୟ ସଂଗଠନ ଅକ୍ସଫୋର୍ଡ ଟିକାକୁ ନିରାପଦ ବୋଲି କହିଛି ।
ଅନେକ ଦେଶରେ ଟିକାକରଣ ଅଭିଯାନ ଆରମ୍ଭ ହୋଇଥିଲେ ମଧ୍ୟ ଏହାର ପ୍ରଭାବକୁ ନେଇ ଅନୁଧ୍ୟାନ କରାଯାଉଛି । କିଛି ଦେଶ ମଧ୍ୟ ଅନ୍ୟ ପ୍ରକାର ଟିକା ଉପରେ ଗବେଷଣା ଚଳାଇଛନ୍ତି । ଉଦାହରଣ ସ୍ୱରୂପ, ଭାରତ କୋଭିଡ ଇନଟ୍ରାନାସାଲ ଟିକା ଉପରେ ପରୀକ୍ଷାନୀରିକ୍ଷା ଚଳାଇଛି । ଏହା ସଫଳ ହେଲେ ଇଂଜେକସନ ପରିବର୍ତ୍ତେ ଟିକା ଡ୍ରପ୍ ଆକାରରେ ଦିଆଯାଇପାରିବ । ଏଠାରେ ଇଟିଭି ଭାରତ ଆପଣଙ୍କୁ ମନେ ପକାଇ ଦେବାକୁ ଚାହେଁ ଯେ, କୋରୋନା ବିରୋଧରେ ଲଢେଇ ଏବେ ବି ଜାରି ରହିଛି । ତେଣୁ କୋଭିଡ କଟକଣା ମାନି ଆମକୁ ସତର୍କତାର ସହ ଚଳିବାକୁ ହେବ ।
