ଡେରାଡୁନ:ଦିନ ଗଡୁଛି ଟେନସନ ବଢୁଛି । ମନରେ ଭୟ ଓ ଆଶଙ୍କା ରହିଛି । ଉତ୍ତରାଖଣ୍ଡ ଉତ୍ତରକାଶୀ ୟମୁନୋତ୍ରୀରେ ନିର୍ମାଣଧୀନ ଟନେଲ ଭୁଶୁଡିବା ଘଟଣା ଆଜକୁ 9 ଦିନ ପୂରଣ ହୋଇଛି । 9 ଦିନ ପରେ ବି ଅନିଶ୍ଚିନ୍ତତା ଜାରି ରହିଛି । ଟନେଲ ତଳ ଚାପି ହୋଇ ରହିଥିବା 41 ଶ୍ରମିକଙ୍କୁ ଉଦ୍ଧାର କରାଯିବା ନେଇ ଏବେ ବି କୌଣସି ସଫଳତା ମିଳିପାରି ନାହିଁ । 9 ଦିନ ହେବ ଟନେଲ ତଳେ ସଂଘର୍ଷ କରୁଛନ୍ତି 41 ଶ୍ରମିକ । ଯୁଦ୍ଧକାଳୀନ ଭିତ୍ତିରେ ଉଦ୍ଧାର କାର୍ଯ୍ୟ ଚାଲିଛି । ଗୋଟିଏ ଗୋଟିଏ ସେକେଣ୍ଡ ଗୁରୁତ୍ବପୂର୍ଣ୍ଣ ହୋଇଛି । ଉଦ୍ଧାରକାର୍ଯ୍ୟ ଆହୁରି ଦୁଇଦିନ ଚାଲିବ ବୋଲି ଉଦ୍ଧାରକାରୀ ଦଳ ପକ୍ଷରୁ ସୂଚନା ମିଳିଛି । ସେପଟେ ଉଦ୍ଧାରାକାର୍ଯ୍ୟ କେତେ ବାଟ ଗଲା ସେ ନେଇ ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମିଙ୍କ ସହ କଥା ହୋଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଇଣ୍ଟରନ୍ୟାସନାଲ ଟନେଲିଂ ଏକ୍ସପର୍ଟ ଘଟଣାସ୍ଥଳରେ ପହଞ୍ଚି ସ୍ଥିତି ପରଖିଛନ୍ତି ।
ଦୁଇଟି ହେଭି ମେସିନରେ ଖନନ କରାଯାଇ ଭିତରକୁ ପାଇପ ସହ ବିକଳ୍ପ ଉପାୟରେ ପାହାଡ ଉପରୁ ଖୋଳା ଆରମ୍ଭ ହୋଇଥିଲା । ମାତ୍ର କୌଣସି ସଫଳତା ମିଳିନଥିଲା । ଟନେଲ ଦ୍ବାରଠୁ ଶ୍ରମିକମାନେ 50 ମିନଟର ଦୂରରେ ରହିଛନ୍ତି । ଏବେ ଭୂଲମ୍ବ (ଭର୍ଟିକାଲ) ଲାଇନରେ ଖୋଳା ଆରମ୍ଭ ହେବ । ଉଦ୍ଧାରକାର୍ଯ୍ୟ ଆହୁରି 2 ଦିନ ଲାଗିବ ବୋଲି ସୂଚନା ମିଳିଛି ।
ଇଣ୍ଟରନ୍ୟାସନାଲ ଟନେଲିଂ ଏକ୍ସପର୍ଟ ଅର୍ଡନୋଲ୍ଡ ଡିକ୍ସ କହିଛନ୍ତି, '' ସେମାନଙ୍କୁ ବାହାର କରିବାକୁ କାର୍ଯ୍ୟ ଜାରି ରହିଛି । ଏହା ଏକ ବଡ଼ କାର୍ଯ୍ୟ । ଆମ ଟିମ୍ ଏଠାରେ ରହିଛନ୍ତି । ଶ୍ରୀଘ୍ର ସମାଧାନ ବାଟ ବାହାରିବ । କେବଳ ଉଦ୍ଧାର ନୁହେଁ ସମସ୍ତଙ୍କୁ ସୁରକ୍ଷିତ ଉଦ୍ଧାର କରିବା ଅଧିକ ଗୁରୁତ୍ବୁପୂର୍ଣ୍ଣ । ସମଗ୍ର ବିଶ୍ବ ସାହାଯ୍ୟ କରୁଛି । ଯୋଜନାବଦ୍ଧ ଭାବେ କାର୍ଯ୍ୟ ଚାଲିଛି । ଶ୍ରମିକଙ୍କୁ ଔଷଧ ଓ ଖାଦ୍ୟ ଉପଲବ୍ଧ କରାଯାଉଛି ।''
ମୁଖ୍ଯମନ୍ତ୍ରୀ ପୁଷ୍କର ସିଂହ ଧାମିଙ୍କ ସହ କଥା ହେଲେ ପ୍ରଧାନମନ୍ତ୍ରୀ:ଉତ୍ତରକାଶୀ ଟନେଲ ଟ୍ରାଜେଡି ଉଦ୍ଧାର କାର୍ଯ୍ୟ ଉପରେ ନଜର ରଖିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଉଦ୍ଧାରକାର୍ଯ୍ୟ କେତେବାଟ ଗଲା ସେ ବିଷୟରେ ଉତ୍ତରାଖଣ୍ଡ ମୁଖ୍ୟମନ୍ତ୍ରୀଙ୍କ ସହ କଥା ହୋଇଛନ୍ତି ପ୍ରଧାନମନ୍ତ୍ରୀ ମୋଦି । ପ୍ରଧାନମନ୍ତ୍ରୀ କହିଛନ୍ତି, କେନ୍ଦ୍ର ସରକାରଙ୍କ ପକ୍ଷରୁ ଆବଶ୍ୟକୀୟ ଉଦ୍ଧାର ଉପକରଣ ଏବଂ ଜରୁରୀ ଜିନିଷ ଉପଲବ୍ଧ କରାଯାଇଛି । କେନ୍ଦ୍ର ଓ ରାଜ୍ୟ ଏଜେନ୍ସିଂ ମଧ୍ୟରେ ଲଗାତାର ସମନ୍ବୟରେ ଶ୍ରମିକଙ୍କୁ ସୁରକ୍ଷିତ ଉଦ୍ଧାର କରାଯିବ । ଏବେ ଫସି ରହିଥିବା ଶ୍ରମିକଙ୍କ ମନୋବଳ ବଢାଇବା ଜରୁରୀ ହୋଇଛି ।