ଡେରାଡୁନ: 10 ଦିନ 240 ଘଣ୍ଟା । ଅନ୍ଧାର ସୁଡଙ୍ଗ ଭିତରେ ଭୟ ଆଶଙ୍କାରେ ଥିବା 41 ଜୀବନ ନିଶ୍ବାସ ପାଇଁ ସଂଘର୍ଷ କରୁଛନ୍ତି । ସମୟ ଯେତିକି ଗଡ଼ୁଛି ଟେନସନ ସେତିକି ବଢୁଛି । ଗତକାଲି ଅନ୍ଧାରୀ ସୁଡ଼ଙ୍ଗ ଭିତରୁ ଏକ ସମ୍ଭାବନା ଆଶା ଦେଖାଯାଇଥିଲା । ପ୍ରଥମ ଥର ପାଇଁ କ୍ୟାମେରା ଜରିଆରେ ଶ୍ରମିକଙ୍କ ଭିଡିଓ ସାମ୍ନାକୁ ଆସିଥିଲା । ଏହି ସମୟରେ ଜମେ ଶ୍ରମିକ ତାଙ୍କ ମାଆଙ୍କୁ ଭାବୁକଭରା ବାର୍ତ୍ତା ଦେଇଛନ୍ତି । ମାଆ ମୁଁ ଭଲ ଅଛି ତୁମେ ଠିକ ସମୟରେ ଖାଇବ ବୋଲି କହିଛନ୍ତି ଟନେଲ ତଳେ ଚାପି ହୋଇଥିବା ଜଣେ ଶ୍ରମିକ । ଏହା ଶୁଣିବା ପରେ ସମସ୍ତଙ୍କ ଆଖିରେ ଲୁହ ଆସି ଯାଇଥିଲା ।
ଉତ୍ତରାଖଣ୍ଡ ଉତ୍ତରକାଶୀ ନିର୍ମାଣଧୀନ ଟନେଲ ଦୁର୍ଘଟଣାରେ ଚାପି ହୋଇ ରହିଥିବା 41 ଶ୍ରମିକଙ୍କ ମଧ୍ୟରୁ ଜଣେ ଶ୍ରମିକ ତାଙ୍କ ପରିବାରକୁ ଭାବୁକ ବାର୍ତ୍ତା ପଠାଇଛନ୍ତି । ଜୟଦେବ ନାମକ ଜଣେ ଶ୍ରମିକ ତାଙ୍କ ମାଆଙ୍କ ଉଦ୍ଦେଶ୍ୟରେ କହିଥିଲେ,''ମାଆ ମୁଁ ଭଲ ଅଛି ତୁମେ ଠିକ ସମୟରେ ଖାଇବ । ମୋ ବିଷୟରେ ଚିନ୍ତା କର ନାହିଁ । ବାପାଙ୍କୁ ଠିକ ସମୟରେ ଖାଇବାକୁ କହିବ ।'' 6 ଇଞ୍ଚ ବିଶିଷ୍ଠ ପାଇପ୍ ଜରିଆରେ ଏଣ୍ଡ୍ରୋସ୍କୋପି କ୍ୟାମେରାରେ ଶ୍ରମିକ ଜଣଙ୍କ ଏହା କହୁଥିବା ବେଳେ ଉଦ୍ଧାରକାରୀ ଦଳ ଭାବୁକ ହୋଇପଡିଥିଲେ । ସମସ୍ତଙ୍କ ଆଖିରେ ଲୁହ ଆସି ଯାଇଥିଲା ।
ଗତକାଲି(ମଙ୍ଗଳବାର) 6 ଇଞ୍ଚର ପାଇପ୍ ଜରିଆରେ ଏଣ୍ଡ୍ରୋସ୍କୋପିକ କ୍ୟାମେରା ସୁଡ଼ଙ୍ଗ ଭିତରକୁ ପଠାଯାଇଥିଲା । ଏଥିସହ ୱାକିଟକି ଦ୍ବାରା ଶ୍ରମିକଙ୍କ ସହ କଥାବାର୍ତ୍ତା ହୋଇଥିଲା । ସମସ୍ତ ଶ୍ରମିକ ସୁରକ୍ଷିତ ଥିବା କହିଥିଲେ । କ୍ୟାମେରା ସାମ୍ନାରେ ସମସ୍ତେ ମୁହଁ ଦେଖାଇଥିଲେ । ଜୟଦେବ ନାମକ ଜଣେ ଶ୍ରମିକ କ୍ୟାମେରା ଆଗରେ ତାଙ୍କ ମାଆଙ୍କୁ ଭାବୁକ ଭରା ବାର୍ତ୍ତା ଦେଇଥିଲେ । ସେ ବଙ୍ଗଳା ଭାଷାରେ ତାଙ୍କ ମଆଙ୍କ ପାଇଁ ବାର୍ତ୍ତା ଦେଇଥିଲେ । ଅନ୍ଧାରୀ ସୁଡଙ୍ଗ ଭିତରୁ ପ୍ରଥମ ଥର ପାଇଁ ସମସ୍ତଙ୍କ ଭିଡିଓଟି ସାମ୍ନାକୁ ଆସିବା ପରେ କିଛିଟା ଆଶ୍ବସ୍ତି ମିଳିଥିଲା । ଟନେଲରେ 8 ରାଜ୍ୟର ମୋଟ 41 ଶ୍ରମିକ ଫସି ରହିଛନ୍ତି । ଭର୍ଟିକାଲ ଡ୍ରିଲିଂ ପାଇଁ ସ୍ଥାନ ନିରୂପଣ ସରିଛି ।