ଡେରାଡୁନ: ଦେବଭୂମିରେ ବର୍ଷାର ତାଣ୍ଡବ । ୨ ଦିନରୁ ଲଗାଣ ବର୍ଷା ଯୋଗୁଁ ବନ୍ୟା ବିପର୍ଯ୍ୟୟ ଦେଖିବାକୁ ମିଳିଛି । ଅକ୍ଟୋର ୧୯ ତଥା ମଙ୍ଗଳବାର ପାଇଁ ପ୍ରବଳରୁ ଅତି ପ୍ରବଳ ବର୍ଷା ନେଇ ଅରେଞ୍ଜ ୱାର୍ଣ୍ଣିଂ ଜାରି କରିଥିଲା ପାଣିପାଗ ବିଭାଗ । ଅନେକ ଜିଲ୍ଲାରେ ପ୍ରବଳ ବର୍ଷା ସହ ଉତ୍ତରକାଶୀ, ଚାମୋଲି, ବାଗେଶ୍ବର, ପିଥୌରାଗଡର ପାର୍ବ୍ୟତାଞ୍ଚଳରେ ବରଫପାତର ମଧ୍ୟ ଆଶଙ୍କା ରହିଥିବା ପାଣିପାଗ ବିଭାଗ ଚେତାବନୀ ଦେଇଛି ।
ଉତ୍ତରଖଣ୍ଡରେ ଗତ ୩ ଦିନରୁ ମୂଷଳଧାରାରେ ବର୍ଷା ଲାଗି ରହିଛି । ଗତ ୪୮ ଘଣ୍ଟା ମଧ୍ୟରେ ବର୍ଷା କାରଣରୁ ୨୩ ଜଣଙ୍କ ଜୀବନ ଯାଇସାରିଲାଣି । କେବଳ କୁମାଉଁରେ ୧୭ ଜଣଙ୍କ ମୃତ୍ୟୁ ହୋଇଛି । ସୋମବାର ପୌଡିରେ ୩, ଚମ୍ପାୱତରେ ୨ ଓ ପିଥୌରାଗଡରେ ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଛି । ସେହପରି ନୈନିତାଲରେ ୧୩, ଅଲମୋଡାରେ ୪, ଉଦ୍ଧମସିଂହନଗରରେ ଜଣେ ଲେଖାଏଁ ନିଖୋଜ ଥିବା କୁହାଯାଉଛି ।