ମୁମ୍ବାଇ: ମରାଠା ସଂରକ୍ଷଣ ପ୍ରସଙ୍ଗରେ ମହାରାଷ୍ଟ୍ର ସରକାର ଡାକିଥିବା ସର୍ବଦଳୀୟ ବୈଠକ ଶେଷ ହୋଇଛି । ଏହି ବୈଠକରେ ଅଂଶଗ୍ରହଣ କରିଥିବା ସମସ୍ତ ରାଜନୈତିକ ଦଳ ସଂରକ୍ଷଣ ପ୍ରଦାନ କରାଯିବା ସପକ୍ଷରେ ମତ ଦେଇଥିବା ନିଜେ ମୁଖ୍ୟମନ୍ତ୍ରୀ ଏକନାଥ ସିନ୍ଦେ ଗଣମାଧ୍ୟମରେ ସ୍ପଷ୍ଟ କରିଛନ୍ତି । ଗତ କିଛି ଦିନ ଧରି ରାଜ୍ୟର ଏକାଧିକ ସ୍ଥାନରେ ହିଂସା ଦେଖାଯିବା ପରେ ଆଜି ସିନ୍ଦେ ସରକାର ଏହି ସର୍ବଦଳୀୟ ବୈଠକ ଡାକିଥିଲେ ।
ମାତ୍ର ଏହି ବୈଠକରେ ପୂର୍ବତନ ମୁଖ୍ୟମନ୍ତ୍ରୀ ତଥା ଶିବସେନା ଉଦ୍ଧବ ଗୋଷ୍ଠୀ ମୁଖ୍ୟ ଉଦ୍ଧବ ଠାକରେ କିମ୍ବା ତାଙ୍କ ଦଳର କେହି ପ୍ରତିନିଧିଙ୍କୁ ଦେଖିବାକୁ ମିଳିନଥିଲା । ଅନ୍ୟପଟେ ଏହି ପ୍ରସ୍ତାବ ସହ ରାଜ୍ୟର ହିଂସା ରୋକିବା ପାଇଁ ମଧ୍ୟ ବୈଠକରେ ପ୍ରାଥମିକତା ଦିଆଯାଇଛି । ସଂରକ୍ଷଣ ଆନ୍ଦୋଳନର ନେତୃତ୍ବ ନେଉଥିବା ମନୋଜ ଜାରାଙ୍ଗେଙ୍କୁ ଆମରଣ ଅନଶନ ଭଙ୍ଗ କରିବାକୁ ମଧ୍ୟ କୁହାଯାଇଛି ।
ବୈଠକ ଶେଷ ହେବା ପରେ ଗଣମାଧ୍ୟମକୁ ସୂଚନା ଦେଇ ମୁଖ୍ୟମନ୍ତ୍ରୀ ସିନ୍ଦେ କହିଛନ୍ତି,‘‘ମରାଠା ସମ୍ପ୍ରଦାୟ ସଂରକ୍ଷଣ ପାଇବା ଉଚିତ ବୋଲି ସମସ୍ତେ ସହମତ ହୋଇଛନ୍ତି । ବୈଠକରେ ଏହା ମଧ୍ୟ ନିଷ୍ପତ୍ତି ନିଆଯାଇଛି ଯେ, ସଂରକ୍ଷଣ ଲ’ ଓ୍ବାର୍କଫ୍ରେମ ମଧ୍ୟରେ ହେବା ଉଚିତ ଓ ଏହାକୁ ପ୍ରସ୍ତୁତ କରିବା ବେଳେ ଅନ୍ୟ ସମ୍ପ୍ରଦାୟ ପ୍ରତି ଅନ୍ୟାୟ ନହେବା ନେଇ ମଧ୍ୟ ଧ୍ୟାନ ଦେବାକୁ ହେବ । ତେବେ ଆଜି ବୈଠକରେ ଏହି ପ୍ରସ୍ତାବକୁ ସର୍ବସମ୍ମତି କ୍ରମେ ସମର୍ଥନ ମିଳିଛି ।’’
ଏହି ସର୍ବଦଳୀୟ ବୈଠକରେ ମୁଖ୍ୟମନ୍ତ୍ରୀ ସିନ୍ଦେ, ଉପମୁଖ୍ୟମନ୍ତ୍ରୀ ଫଡନାଭସିଙ୍କ ସମେତ ରାଜ୍ୟର ପୂର୍ବତନ ମୁଖ୍ୟମନ୍ତ୍ରୀ ତଥା ବରିଷ୍ଠ ରାଜନେତା ଶରଦ ପାଓ୍ବର, ପୂର୍ବତନ ମୁଖ୍ୟମନ୍ତ୍ରୀ ତଥା ବରିଷ୍ଠ କଂଗ୍ରେସ ନେତା ଅଶୋକ ଚୌହାନ, ବିଧାନସଭା ବିରୋଧୀ ଦଳ ନେତା ବିଜୟ ଓ୍ବାଦିତିଓ୍ବାର ଓ ବିଧାନ ପରିଷଦରେ ବିରୋଧୀ ଦଳ ନେତା ଆମ୍ବାଦାଶ ଡାନଭେ, ଏକାଧିକ ମନ୍ତ୍ରୀ ଓ ରାଜ୍ୟରେ ସକ୍ରିୟ ଥିବା ପ୍ରାୟ ସମସ୍ତ ରାଜନୈତିକ ଦଳର ପ୍ରତିନିଧି ସାମିଲ ହୋଇଥିଲେ ।