ଚେନ୍ନାଇ: ତାମିଲନାଡ଼ୁ ଭିଲ୍ଲୁପୁରମ ଅଞ୍ଚଳରେ ଜଣେ ସଫ୍ଟୱେର ଟେକନିସିଆନ ଚନ୍ଦ୍ରଶେଖରନଙ୍କ ମହାନତା । ନିଜ ସଞ୍ଚିତ ଅର୍ଥରୁ ଗାଁ ରାସ୍ତା ନିର୍ମାଣ ପାଇଁ ଖର୍ଚ୍ଚ କରି ଚର୍ଚ୍ଚାରେ ଚନ୍ଦ୍ରଶେଖରନ । ବିବାହ ପାଇଁ ସଞ୍ଚୟ କରିଥିବା ଅର୍ଥରୁ ପ୍ରାୟ ୯.୫ ଲକ୍ଷ ଟଙ୍କା ଖର୍ଚ୍ଚ କରିଛନ୍ତି ସେ । ଏହି କାର୍ଯ୍ୟ ଲାଗି ତାଙ୍କୁ ସ୍ଥାନୀୟ ଅଞ୍ଚଳରେ ବେଶ ପ୍ରଶଂସା କରାଯାଇଛି ।
ଭନୁର ନଲ୍ଲାଭୁର ଗ୍ରାମବାସୀ ହେଉଛନ୍ତି ଚନ୍ଦ୍ରଶେଖରନ । ସେ ଚେନ୍ନାଇରେ ଏକ ଘରୋଇ ସଫ୍ଟୱେର କମ୍ପାନୀରେ କାର୍ଯ୍ୟ କରନ୍ତି । ଗତ ୨୦ ବର୍ଷ ଧରି ତାଙ୍କ ଗାଁରାସ୍ତାକୁ ସ୍ଥାନୀୟ ପ୍ରଶାସନ ମରାମତି କରିନଥିବାରୁ ସେ ଏପରି ପଦକ୍ଷେପ ଗ୍ରହଣ କରିଛନ୍ତି । ସେ ନିଜ ବିବାହ ଲାଗି ସଞ୍ଚୟ କରିଥିବା ଅର୍ଥକୁ ରାସ୍ତା ନିର୍ମାଣ କାର୍ଯ୍ୟରେ ଲଗାଇଛନ୍ତି । ଏଥିଲାଗି ସେ ପ୍ରଥମେ ନିଜ ପିତାମାତାଙ୍କୁ ବୁଝାଇବା ପରେ ୯ ଲକ୍ଷ ୫୦ ହଜାର ଟଙ୍କା ବ୍ୟୟ କରିଛନ୍ତି ।
ଏ ନେଇ ଚନ୍ଦ୍ରଶେଖରନ କହିଛନ୍ତି, "ମୁଁ ଚେନ୍ନାଇର ଏକ ଘରୋଇ ଟେକ୍ନୋଲୋଜି କମ୍ପାନୀରେ ବରିଷ୍ଠ ଟେକନିସିଆନ ଭାବେ କାର୍ଯ୍ୟ କରୁଛି । ସ୍ଥାନୀୟ ଇଶ୍ବରାନ କୋଲି ରାସ୍ତା ଗତ ୨୦ ବର୍ଷ ଧରି ମରାମତି ହୋଇନାହିଁ । ଏଥିଲାଗି ଏବେ ରାସ୍ତା ଦୁର୍ଗମ ହୋଇପଡ଼ିଛି । ବର୍ଷାଦିନେ ଏହି ରାସ୍ତାରେ ଚାଲିବା ମଧ୍ୟ କଷ୍ଟକର । ବାରମ୍ବାର ସ୍ଥାନୀୟ ପ୍ରଶାସନକୁ ରାସ୍ତା ନିର୍ମାଣ ପାଇଁ କହିବା ଅପେକ୍ଷା ନିଜ ସଞ୍ଚିତ ଅର୍ଥରୁ ବ୍ୟୟ କରିବା ଭଲ ।"