ନୂଆଦିଲ୍ଲୀ:ଭାରତର ନିର୍ବାଚନ କମିଶନ ତେଲେଙ୍ଗାନା ଆଇପିଏସ୍ ଅଧିକାରୀ ତଥା ପୂର୍ବତନ ରାଜ୍ୟ ପୋଲିସ ମହାନିର୍ଦ୍ଦେଶକ ଅଞ୍ଜନୀ କୁମାରଙ୍କ ଉପରେ ଲଗାଇଥିବା ନିଲମ୍ବନ ଆଦେଶକୁ ହଟାଇ ଦେଇଛନ୍ତି । ଡିସେମ୍ବର ୩ ତାରିଖରେ ନିର୍ବାଚନ ଆଚରଣ ବିଧି ଉଲ୍ଲଂଘନ ଅଭିଯୋଗରେ ଅଞ୍ଜନୀଙ୍କୁ ସସପେଣ୍ଡ କରିଥିଲେ ନିର୍ବାଚନ କମିଶନ।
ନିର୍ବାଚନ କମିଶନଙ୍କ କାର୍ଯ୍ୟାନୁଷ୍ଠାନ ପରେ, କମିଶନଙ୍କ ଦ୍ବାରସ୍ଥ ହୋଇଥିଲେ ଅଞ୍ଜନୀ କୁମାର । ଆଉ କେବେ ଏଭଳି ହେବ ନାହିଁ ବୋଲି ସେ ନିର୍ବାଚନ କମିଶନଙ୍କୁ ଆଶ୍ୱାସନା ଦେଇଥିଲେ । ଅଞ୍ଜନୀଙ୍କ ଆବେଦନ ଉପରେ ବିଚାର କରିବା ପରେ କମିଶନ ନିଲମ୍ବନ ହଟାଇବାକୁ ନିଷ୍ପତ୍ତି ନେଇଛନ୍ତି। ନିିର୍ବାଚନ କମିଶନ ନିଲମ୍ବନ ଆଦେଶ ପ୍ରତ୍ୟାହାର ସଂପର୍କରେ ତେଲେଙ୍ଗନା ସରକାରଙ୍କୁ ସୂଚନା ଦେଇଛନ୍ତି ।
ଏହା ମଧ୍ଯ ପଢ଼ନ୍ତୁ: ରାଜସ୍ଥାନ ସିଏମ୍ ରେସ୍: ପ୍ରବୀଣ ନା ନବୀନ, ଦୌଡ଼ରେ ଆଉ ଜଣେ ମହିଳା ! ଆଜି ଘୋଷଣା
ଅଞ୍ଜନୀ କୁମାର ପାଇଁ ମହଙ୍ଗା ପଡ଼ିଥିଲା ନିର୍ବାଚନ ଆଦର୍ଶ ଆଚରଣ ବିଧି ଉଲ୍ଲଂଘନ। ଡିସେମ୍ବର ୩ରେ ତେଲେଙ୍ଗାନା ବିଧାନସଭା ନିର୍ବାଚନ ପାଇଁ ଭୋଟ୍ ଗଣତି ଚାଲିଥିବା ବେଳେ, ପସିସି ସଭାପତି ରେବନ୍ତ ରେଡ୍ଡିଙ୍କୁ ଶୁଭେଚ୍ଛା ଜଣାଇବାକୁ ପହଞ୍ଚି ଯାଇଥିଲେ ଡିଜିପି ଅଞ୍ଜନୀ କୁମାର । ଏହାକୁ ଆଦର୍ଶ ଆଚରଣ ବିଧି ଉଲ୍ଲଂଘନ ଦର୍ଶାଇ ତାଙ୍କୁ ପୋଲିସ ଡିଜି ପଦରୁ ନିଲମ୍ବିତ କରିଥିଲେ ନିର୍ବାଚନ କମିଶନ । ତାଙ୍କ ସ୍ଥାନରେ ବରିଷ୍ଠ ଆଇପିଏସ ଅଫିସର, ରବି ଗୁପ୍ତାଙ୍କୁ ତେଲେଙ୍ଗାନାର ଜିଡିପି ଦାୟିତ୍ବ ଦେଇଥିଲେ ।